Әлеуметтік желілер мен мессенджерлерде шатырдан үлкен мұздың сәби мен ананың үстіне құлаған видео тарап жатыр. WhatsApp арқылы видеомен бірге тараған аудио жазбада белгісіз ер адам бұл оқиға Орал қаласында болғанын айтады.
Sarapshy.info редакциясы ақпаратты тексеріп көрді. Аталған оқиға 3 наурыз күні Дағыстан Республикасының Махачкала қаласында болған. Бұл туралы «Аргументы и факты» басылымы жазды.
Оқиға Махачкаланың Гаджи Алибекова, 78 мекенжайындағы көпқабатты үйдің жанында орын алған. Видеода құлаған мұздың астында қалған сәби анасының қолынан ұшып кетеді де, асфальтқа құлайды Ал анасы ешқандай қозғалыссыз қалады.
Видеоға қатысты не белгілі болды?
«Аргумент и факты» басылымы оқиға кезінде анасы орташа дәрежелі жарақат алып, ал сәбиге ештеңе болмағанын жазды. Дәрігерлер баланың қалың комбинезоны мен басындағы капюшоны құтқарып қалғанын айтқан.
Қазіргі таңда зардап шеккен әйел Хадижат Ибрагимованың жағдайы тұрақты. Ол әлі де ауруханада жатыр. Дәрігерлер оның бас миының шайқалғанын, эпидуральды гематома және бас сүйегінің жеңіл сынығын айтқан.
Басылым оқиға бойынша қылмыстық іс басталғанын жазды.
