25 тамызда Алматы әуежайында ер адам өзін өртеуге тырысты. Оқиға әуежайдың «Т-1» терминалындағы кассаның жанында болған.
«Сағат 22:06-да ер адам әуежай кассасы маңында өзін-өзі өртеуге әрекет жасаған. Полиция қызметкерлері әуежайдың қауіпсіздік қызметімен бірлесіп шұғыл өртті сөндіріп, жедел жәрдем шақырған. Ер адам қалалық ауруханаға жеткізілді», — деп жазды ҚазАқпарат.
Аталған оқиға бойынша Көлік полициясы департаменті қылмыстық іс қозғады. Қазір тергеу жүргізіліп, оқиғаның мән-жайы анықталып жатыр.
Алматы қалалық қоғамдық денсаулық сақтау басқармасы пациент жедел медициналық жәрдем бригадасымен № 4 қалалық клиникалық ауруханаға жеткізіліп, жансақтау бөліміне жатқызылғанын хабарлады.
Белгілі болғаны, науқастың жағдайы өте ауыр.
«ҚР ДСМ хаттамасына сәйкес ем қабылдап жатыр», — делінген хабарламада.
Еске салсақ, 7 наурызда Алматы әуежайының ішкі рейстер терминалында ер адам әуежай қызметкерін кепілге алған еді. Оқиғаға қатысты іс қозғалып, ол 11 жылға бас бостандығынан айырылды.
Фото: Wikipedia
