Алматы халықаралық әуежайында жолаушыны кепілге алып, жарылыс жасайтынын айтқан ер адам 11 жылға бас бостандығынан айырылды. Бұл туралы Түрксіб аудандық сотының баспасөз қызметі хабарлады.
7 наурызда Б. есімді азамат тіркеу залында инспектордың заңды талабына бағынбай, пышақ шығарып, әйелді кепілге алған.
Сол сәтте оқиға орнында болған басқа бір қызметкер өзін кепілге алуын сұрап, әйелді босатуға көндірген. Ержүрек азамат көмегі нәтижесінде күдіктіні жасақ тез ұстады.
Сотта айыпталушы өз кінәсін толық мойындап, жасаған ісіне өкініш білдірді. Прокурор 10 жыл 6 ай сұраса, сот оның ауыр қылмыс жасағанын және бұрын да сотты болғанын ескеріп, 11 жыл жаза тағайындады.
Сот үкімі әзірге заңды күшіне енген жоқ.
фото: pexels
