Бүгін, 7 наурызда сағат 11:45 шамасында Алматы әуежайының ішкі рейстер терминалында ер адам әуежай қызметкерін кепілге алған. Алматы әуежайының баспасөз қызметі оқиғаны растаған. Бұл туралы Азаттық хабарлады.
“Сағат 11:45-те жолаушы кейпіндегі ер адам ішкі терминалдағы тексеріс аймағына жақындады. Авиация қауіпсіздігі қызметінің өкілдері ер адамнан құжаттарын көрсетуді сұраған кезде ол қызметкерді шашынан ұстап алып, пышақпен қорқыта бастады. 7 минуттан кейін ер адам қарусыздандырылды. Қазіргі уақытта ер адам желілік полиция бөлімінде” деп хабарлаған әуежай өкілдері.
Әлеуметтік желіде тараған видеода ер адамның бір қолымен әйелдің шашынан ұстап, екінші қолымен пышақты ұстап тұрғанын көруге болады. Айналасында жолаушылар мен әуежай қызметкерлері байқалады.
