Батыс Қазақстан облысының Бәйтерек ауданындағы Зеленое ауылы халқының ауыз су талап етіп облыс әкіміне видео үндеу жолдады.
Ауылдың ортасына жиналған елу шақты адам мәселесін ортаға салды:
Видео үндеу жарияланған соң үш күннен соң ауылға БҚО әкімі Ғали Есқалиев арнайы барды. Әкімнің жанында Бәйтерек ауданының әкімі Марат Тоқжанов, Мичурин ауылының әкімі Максим Мусалимов, аудан әкімдігінің түрлі бөлім басшылары, мемлекеттік БАҚ тілшілері – бір топ адам болды.
Тұрғындар ауыл шетіне жиналып тұрды. Бәрінің атынан өткен жолы бізге сұхбат берген ауыл тұрғыны Тілеген Жұматов бастап сөйледі. Облыс әкіміне жол, интернет, қоқыс шығару сияқты басқа да мәселелер барын, бірақ ең басты мәселе ауыз су екенін айтты. «Мәселенің бәрін бірден шешіңдер демейміз. Онша айқайлап жатқан жоқпыз, осынша жыл шыдап келдік. Дауысымызды қаттырақ көтеруге тура келді. Бірнеше жылдан айтып келеміз, еститін уақыт болған сияқты» деді Тілеген Жақияұлы. Одан кейін су таситын көліктің жүргізушісі, аудан мен ауыл басшылары кезек-кезек сөйледі.
Бәрін тыңдаған облыс әкімі:
-Негізі айтып отырғаныңыз дұрыс. Қаланың қасында жатқан ауыл. Әрине орталықтандырылған су болу керек. Енді біздікілер айтқан болар – ПСД жасалынды. Енді амандық болса биыл жұмыстарды бастап кетеміз. Жылдың аяғына дейін бітіруге тырысамыз. Сондықтан сәл күте тұрыңыз. Жарай ма? – деді Ғали Есқалиев (сөзі еш өзгеріссіз).
«Мұндай уәдеге тойдық, бұған дейін естіп келеміз» деп тарқасты ауыл тұрғындары. Зеленое ауылында ешқашан орталықтандырылған ауыз су болмаған, уәде берілумен келген. Облыс орталығы Орал қаласымен қосылып жатқан Мичурин ауылы мен Зеленое ауылын Шаған өзені ғана бөліп тұр. Ауыз су көлікпен тасымалданып, литрі 1 теңгеден сатылады. Әкімдік су таситын көлікке бензин бөледі. Тозығы жеткен ескі көлік жиі бұзылады, қаңтар айында ауыл сумен бір рет қамтылған. Күші жететіндер Шаған өзенін ойып, су алып ішеді. Кейбірі өзеннен су алып шығуға шамасы келмегесін қар суын ерітіп ішіп отыр. Бәйтерек ауданында орталықтандырылған ауыз су жетпеген әлі бірнеше ауыл бар…
Нұрлыбек Рахманов,
sarapshy.info ақпарат агенттігінің бас редакторы