Албания министр қызметіне жасанды интеллектті тағайындаған әлемдегі алғашқы ел атанды. Мемлекеттік сатып алуларды қадағалайтын жасанды интеллект-министр «Diella» деп аталады. Бұл жөнінде Politico басылымы жазды.
«Diella» атауы албан тілінде «күн» деген мағынаны білдіреді.
Елдің премьер-министрі Эди Раманың айтуынша, мемлекеттік тендерлердің шешімдері кезең-кезеңімен министрліктерден «Diella-ға» беріледі. Қорытындысында Албания мемлекеттік тендерлері 100% сыбайлас жемқорлықтан арылған елге айналады. Ел қаржысы ашық, толық бақылауда болады.
Жасанды интеллект қазірдің өзінде жұмысын бастап кеткен.
Бүгінде әлемде жасанды интеллект технологиялары кеңінен қолданыла бастады. McKinsey зерттеулеріне сәйкес, 2030 жылға қарай AI-дің жаһандық экономикаға қосар үлесі $20 трлн болуы мүмкін.
Қазақстандағы жасанды интеллект
Жақында Қазақстанда жасанды интеллект министрлігі құрылады. Ел президенті Тоқаевтың айтуынша, Қазақстан үш жыл ішінде жаппай цифрлық ел болуы керек.
Қазақстанда 2024 жылы алғашқы жасанды интеллект мектебі – Tomorrow School ашылды. Биыл Ұлттық AI платформасы іске қосылды. Өңірдегі алғашқы ұлттық тілдік модель KazLLM құрылды.
Сондай-ақ Астанада Халықаралық жасанды интеллект орталығы ашылады. «Аlem.ai» орталығы ғылым, өнеркәсіп, шығармашылық индустриялар мен мемлекеттік қызметтер сияқты негізгі салаларда технологияларды дамытуға бағытталған. Жобаның аясында жыл сайын түрлі салалардан шамамен 10 000 талантты тарту, кемінде 1 000 жасанды интеллект маманын даярлау, шамамен 100 жасанды интеллект стартапын іске қосу және жасанды интеллект саласында 10 ғылыми зерттеу жүргізу жоспарланған.
Былтыр шілдеде елде Жасанды интеллектіні дамытудың 2024-2029 жылдарға арналған тұжырымдамасы қабылданды.
Фото: Freepik.com
