Бүгін, 20 наурызда «Алатау қаласының арнаулы мәртебесі туралы» Конституциялық заң жобасы мақұлданды. Бұл туралы Парламент палаталарының бірлескен отырысында белгілі болды.
Қала республикалық маңызы бар Алматы-Өскемен тасжолының бойында орналасады.
Премьер-министрдің орынбасары Қанат Бозымбаевтың айтуынша, қазір Алатау қаласына инвесторлардың қызығушылығы жоғары. Бүгінге дейін жалпы құны 1,8 трлн теңгені құрайтын 44 инвестициялық жоба құрылған. Қалада 30 мыңға жуық жұмыс орнын ашу жоспарланып отыр.
Қалада Alatau City Authority атты жаңа басқару органы құрылмақ. Оның стратегиялық бағытын Премьер-министр басқаратын кеңес айқындайды.
Айта кетейік, үкімет Алатау қаласы құрылысын қаржыландырмайды. Жер қатынастары арнайы тәртіппен реттелмек. Инвесторларға жер учаскелері тек нақты жобаларды жүзеге асыру үшін уақытша беріледі. Егер екі жыл ішінде жоба іске аспаса, айыппұл салынып, тағы екі жыл ішінде нәтиже болмаса, жер мемлекетке қайтарылады.
фото: gov.kz
