Бұл туралы отандық бұқаралық ақпарат құралдары Көлік министрлігіне сілтеме жасап хабарлауда.
Апаттан соң Бразилияға жеткізілген қара жәшіктердегі ақпаратты оқу қаңтар айының басында аяқталған. Соңғы ақпарат бойынша, деректер Қазақстанға жеткізілді.
Көлік министрлігінің авиациялық оқиғаны тергеу жөніндегі комиссиясы Бразилиядан келген мәліметті талдап отырып, алдағы уақытта есебін жариялайтын болады.
Зерттеуге Қазақстан, Әзербайжан және Ресей тергеушілері қатысты.
Естеріңізге сала кетейік, 25 желтоқсан күні, таңертең Azerbaijan Airlines әуе компаниясына тиесілі Embraer 190 жолаушылар ұшағы Бакуден Грозныйға ұшу кезінде Ақтау қаласынан 3 шақырым жерде құлады. Ұшақ бортында болған 67 жолаушының 38-і қаза тапты, 29-ы Ақтаудағы ауруханаға жеткізілген еді. Әуе кемесінде болғаг Қазақстанның 6 азаматы да қаза тапты.
Әзербайжан Президенті Әлиев ұшақ апатына Ресейді кінәлап, жауапкершілік солардың мойнында екенін айтты. Президент мәлімдесіне дейін Euronews Әзербайжан үкіметіндегі дереккөздерге сілтеме жасап, Ақтаудағы ұшақ апатына Грозный аспанына көтерілген Ресей зымыраны себеп болғанын хабарлады.
Апатқа қатысты пікір білдірген саясаттанушы Ғазиз Әбішев бұл жағдайда «Ресейдің соңғы ұстанымы маңызды рөл атқаратынын айтады». Себебі Ресей мен Әзербайжан одақтас елдер болған соң, бір-біріне ашық болуының маңызы зор дейді.
Премьер-Министр Олжас Бектенов Ақтау маңындағы ұшақ апатынан кейін авиациялық қауіпсіздікті күшейтуді тапсырған еді.
Сурет: ҚР Төтенше жағдайлар министрлігі
