«Былтыр 1,2 миллион тонна қызылшаның тек 700 мың тоннасы өңдеуге жіберіліп, қалған бөлігі шіріп кетті», — деді сенат отырысында депутат Зәкіржан Кузиев.
Депутаттың айтуынша, елдегі қант өндірісі ақсап тұр. Өндірілген өнім көлемі артқанымен, оларды өңдеуге жаңа зауыттар жеткіліксіз.
«2024 жылы қызылша егілетін жерлер 17 мың гектардан 25 мың гектарға дейін кеңейтілді, фермерлерге 22 миллиард теңге субсидия бөлінді. Соның нәтижесінде, жиналған өнім көлемі екі есеге артты», — дейді депутат. Алайда ол бұл көрсеткіштердің қант өндірісінің нақты дамуын көрсетпейтінін айтады.
Елдегі төрт қант зауытының үшеуі ғана қызылшаны қайта өңдеумен айналысады. Бұл жердегі мәселе өнімді өңдеуге зауыттардың қуаты жетіспейді.
«2023 жылы Тараз қант зауытында жаңа қондырғылар орнатылуы тиіс еді, бірақ бұл жұмыс әлі жүзеге асырылмады. Егер зауыт жаңғыртылғанда, ол 600 мың тоннаға дейін қызылша өңдей алар еді», — деп тілге тиек етті депутат.
Тараз қант зауыты Ресейдіңс «Доминант» компаниясына тиесілі екені депутаттың сөзінен белгілі болып отыр. Бұл компания Еуразиядағы ірі қант өндірушілердің бірі екені және Ресейде жеті қант зауытына иелік ететіні мәлім болды.
Алайда депутат «Доминант» екі жыл бойы Тараз қант зауытын жаңғырту жұмыстарын жүргізбегенін айтады.
«Неліктен инвестор зауытты жаңғырту бойынша өз міндеттемелерін орындамады – бізге белгісіз. Бірақ соған қарамастан, мемлекет жыл сайын қант зауыттарына жеңілдетілген несиелер бөліп келеді», – деді депутат.
Айта кетейік, елде 25 ақпан мен 4 наурыз аралығында құмшекердің орташа бағасы 1,4%-ға қымбаттады.
Сурет: Руслан Пряников/kapital.kz
