Батыс Қазақстан облысы мәдениет, тілдерді дамыту және архив ісі басқармасы (бұрынғы тілдерді дамыту басқармасы — ред) мемлекеттік тіл бойынша тренинг өткізу үшін осы жылы 16 млн 640 мың теңге бөлген.
Мемлекеттік сатып алу порталынының дерегінше, мекеме 16 мамыр күні «ARDAMIDI» ЖШС-мен келісімшарт жасасқан. Тендер ашық конкурс арқылы өткен. Келісімшартқа сәйкес, «ARDAMIDI» ЖШС биылғы 31 желтоқсанға дейін мемлекеттік тілден тренингтер өткізуге тиіс. Бірақ құжатта тренингке кімдер қатысатыны, қайда өтетіні көрсетілмеген, адам саны да белгісіз.
Техсипаттамада «Тіл үйренушінің басты мақсаты — сол тілде өз ойын жеткізе алатындай дәрежеде игеру және көпшілік алдында өз ойын еркін жеткізе алатындай дәрежеде сөз сөйлеу» деп көрсетілсе, ал келісімшартта: «Батыс Қазақстан облысында тұратын Қазақстан Республикасының азаматын қазақ тілін үйрету курстарында оқыту» деп жазылған.
Бір қызығы, дәл осы тендерден бөлек, «ARDAMIDI» жауапкершілігі шектеулі серіктестігі ағылшын тілін үйрету үшін 13 мамыр күні 13 млн 360 мың теңгенің тендерін және «ұтқан». Ашық конкурс арқылы. Екі тендердің арасы бар болғаны үш-ақ күн. 13-16 мамыр. Тапсырыс беруші сол баяғы — мәдениет, тілдерді дамыту және архив ісі басқармасы.
Бұл тендердің техсипаттамасында да ағылшын тілін кімдерге оқытатыны жазылмаған яғни жұмбақ күйінде. Осылайша, «ARDAMIDI» ЖШС мәдениет, тілдерді дамыту және архив ісі басқармасынан мемлекеттік және ағылшын тілін оқыту үшін 30 млн теңге алған.
«ARDAMIDI» ЖШС 2020 жылдың 24 қазаны күні тіркелген. Заңды мекенжайы Оралда деп көрсетілген. Оның иесі – Миржан Мұхамбетов деген адам. Ашық дереккөздерде бұл кісі жайлы мүлдем ақпарат жоқ. Бұл серіктестіктің құрылтайшысы әрі басшысы Миржан Мұхамбетовке хабарласып, тренингтерге қанша адам, кімдер «оқытылып» жатқанын сұрағанбыз, бірақ серіктестік басшысы ештеңе білмейтінін айтып, сұраққа жауап бермеді.
Мәдениет, тілдерді дамыту және архив ісі басқармасы өз «тыңдаушыларына» тіл үйрету үшін биыл ғана қыруар қаржы бөліп отырған жоқ. Мемлекеттік сатып алу порталындағы ақпаратта мекеме 2020 жылы мемлекеттік тілді үйретуге 16 433 500 теңге бөлсе, 2021 жылы 18 300 000 теңге жұмсаған. Ал осы жылы қанша қаржы бөлінгенін жоғарыда айтып өттік. Енді ағылшын тілін оқытуға қанша қаржы бөлінгеніне тоқталсақ: Оған 2020 жылы 13 650 000 теңге, 2021 жылы 12 100 000 теңге бөлінген. Осылайша, аталған басқарма мемлекеттік және ағылшын тілінен тренингтер өткізуге үш жылда (осы жылды қоса есептегенде) 90 млн 483 мың 500 теңге қаржы жұмсаған.
Есенжол Елекенов
