Жезқазған қалалық соты Ұлытау облысының Мәдениет, тілдерді дамыту және архив ісі басқармасының басшысы Әнуар Омар мен оның қарамағындағыларға қатысты үкім шығарды. Бұл туралы Сыбайлас жемқорлыққа қарсы іс-қимыл агенттігі хабарлады.
Агенттіктің хабарлауынша, олар мәдени іс-шараларды ұйымдастыру барысында 3,9 млн теңгеге қосымша келісім жасасу арқылы лауазымдық өкілеттіктерін теріс пайдаланған. Атап айтқанда тілдерді дамыту бөлімінің басшысы А. Сарбаеваға, «Облыстық ғылыми-әдістемелік орталығы» КМҚК басшысы Г. Жолашароваға және «Тілдерді дамыту ресурстық орталығы» КММ басшысы Ж. Оспановаға, сондай-ақ жеке компанияның өкілі О. Талғаттың қатысы бар екені көрсетілген.
«Сот үкімімен ӘнуарОмар 6 жыл 6 айға бас бостандығынан айырылса, оның қатысушыларына 1 жылға бас бостандығын шектеу түріндегі жаза тағайындалды. Сонымен қатар, сотталғандарға мемлекеттік қызметте және квазимемлекеттік сектор субъектілерінде қызмет атқаруға өмір бойы тыйым салынды», — делінген хабарламада.
Әнуар Омар — Ұлытау облысының Мәдениет, тілдерді дамыту және архив ісі басқармасындағы қызметіне 2022 жылы тағайындалған. Оған дейін мәдениет саласында, мұрағат ісінде қызмет атқарған. 2010-2016 жылдары Ұлытау селолық округінің әкімі, Ұлытау ауданы әкімінің орынбасары, Ұлытау ауданының әкімі және Сәтбаев қаласының әкімі лауазымдарында болған.
Бұған дейін Мәдениет және спорт министрлігінің бұрынғы вице-министрі Ерлан Қожағапанов мен мердігер ұйым басшыларына қызметтік өкілеттіктерін асыра пайдаланып, 1 млрд теңгеден астам бюджет қаражатын жымқырды деген айып тағылған еді.
Сурет: gov.kz
