Тараз қаласында заңсыз қызмет атқарып келген білім беру ұйымының жұмысы тоқтатылды.
2024 жылы Тараз қаласының прокуратурасы кәмелетке толмағандармен жұмыс істейтін білім беру мекемелерінің қызметіне тексеру жүргізді. Тексеру барысында «Бәйдібек» қайырымдылық мекемесі 2023 жылдан бастап лицензиясыз жұмыс істегенін анықтады.
Аталған мекемеде санитарлық-эпидемиологиялық, көші-қон, өрт-техникалық, еңбек және сәулет-құрылыс нормалары бұзылған. Соған қарамастан, онда 36 бала білім алған.
Заң бұзушылықтар негізінде Тараз қаласының прокуроры Жамбыл облысының мамандандырылған экономикалық сотына мекеменің тіркелгені туралы құжаттың күшін жою туралы талап арыз енгізді.
2024 жылдың 8 қазанында сот шешімімен «Бәйдібек» мекемесінің қызметі тоқтады. Мекеме есептік тіркеуден шығарылды. Шешім заңды күшіне енді.
2024 жылы елде білім беру қызметін лицензиясыз жүргізген 58 мектепке айыппұл салынды. Астана, Алматы, Атырау қаласы, Батыс Қазақстан, Түркістан, Маңғыстау, Алматы және Жамбыл облыстарында мекемелердің лицензиясыз жұмыс істегені анықталды.
Лицензия алудың негізгі талаптары:
- Тиісті материалдық-техникалық базаның болуы.
- Білікті оқытушылар құрамының қамтамасыз етілуі.
- Санитарлық, эпидемиологиялық және өрт қауіпсіздігі нормаларының сақталуы.
- Студенттерге медициналық көмек көрсетуді ұйымдастыру.
Осыған дейін ҚР Оқу-ағарту министрлігі Білім саласында сапаны қамтамасыз ету комитетінің төрағасы Ернұр Дәуенов білім беру мекемелері қызметін бастамас бүрын лицензия алудың міндетті екенін, егер мектеп мемлекеттік тіркеуден өткеннен кейін алты ай ішінде лицензия алмаса сот шешімімен жабылатынын айтқан еді.
Сурет: inbusiness.kz
