Қазақстанда білім беру қызметін лицензиясыз жүргізген 58 мектепке айыппұл салынды. Бұл ақпарат Білім саласында сапаны қамтамасыз ету комитеті жүргізген мониторинг барысында анықталды.
Аудит нәтижелері:
- 2024 жылдың басынан бері 58 мектептің білім беру лицензиясы болмағаны белгілі болды.
- Қазіргі таңда олардың 17-сі талаптарды орындап, лицензия алған.
- Барлық мектептерге ҚР Әкімшілік құқық бұзушылық кодексінің 463-бабы бойынша айыппұл салынды.
- Мектептер Астана, Алматы, Атырау қаласы, Батыс Қазақстан, Түркістан, Маңғыстау, Алматы және Жамбыл облыстарында орналасқан.
«Қазақстан Республикасының «Білім туралы» Заңына сәйкес, кез келген мектеп білім беру қызметін бастамас бұрын лицензия алуы қажет. Лицензияның болмауы мектептің тиісті талаптарға сәйкес келмейтінін немесе рұқсат алуға өтініш бермегенін білдіреді. Егер мектеп мемлекеттік тіркеуден өткеннен кейін алты ай ішінде лицензия алмаса, ол сот шешімімен жабылады», – деп мәлімдеді комитет төрағасы Ернұр Дәуенов.
Лицензия алудың негізгі талаптары:
- Тиісті материалдық-техникалық базаның болуы.
- Білікті оқытушылар құрамының қамтамасыз етілуі.
- Санитарлық, эпидемиологиялық және өрт қауіпсіздігі нормаларының сақталуы.
- Студенттерге медициналық көмек көрсетуді ұйымдастыру.
2024 жылдың 3-тоқсанында ҚР Оқу ағарту министрлігінің Білім саласында сапаны қамтамасыз ету комитетіне лицензия алу үшін 543 өтініш түскен. Олардың 224-іне лицензия берілді. 319 өтініш талаптарға сәйкес болмаған соң бас тартылды.
Білім беру саласындағы басқа да заң бұзушылықтар:
2024 жылдың басынан бері 69 білім беру ұйымында профилактикалық бақылау жүргізіліп, бақылау шараларының нәтижесінде 16 білім беру ұйымында анықталған бұзушылықтар толық жойылды, ал 37 ұйымда оны жою бойынша жұмыстар жүргізілді.
Сурет: astana.gov.kz
