Қашаған консорциумының операторы – NCOC (North Caspian Operating Company) компаниясы факелдерде газды жағу үшін Қазақстан бюджетіне 3,5 миллиард теңге төлеуі тиіс.
Мұндай шешімді Қазақстан Энергетика министрлігінің мұнай-газ кешеніндегі мемлекеттік инспекциясының Батыс өңіраралық басқармасының талап-арызы бойынша Астана қаласының экономикалық соты қабылдады.
Компания өкілдері бұл істі халықаралық арбитражда қарау қажет деп, соттың қарауына қарсылық білдірген. Олардың айтуынша, Қашағанды игеру 1997 жылғы Солтүстік Каспий өнімін бөлісу туралы келісімге сәйкес жүргізілуде. Бірақ сот бұл дәлелдерді қабылдамады және NCOC-тің Қазақстан бюджетіне 726 миллион және 2,8 миллиард теңге көлемінде шығынды өтеу туралы шешім шығарды.
Бұл шешімге компания апелляциялық шағым түсіре алады.
Сонымен қатар, NCOC компаниясымен 150 миллиард доллардан асатын ірі халықаралық арбитраждық дау әлі де жалғасып жатыр. Бұған дейін, 2024 жылдың қазанында Қазақстанның энергетика министрі Алмасадам Сәтқалиев екі жақ алдын ала келісімге күздің соңына дейін қол жеткізеді деп болжаған еді.
Қашаған кен орны – Атырау қаласынан 80 шақырым жерде Каспий теңізінің солтүстік бөлігінде әрі теңізде орналасқан ең ірі мұнай кен орны.
Сурет kmg.kz
