Семейде шырша безендіру кезінде құлап, ауыр жарақат алған мұғалім Қуат Айтқалиге қатысты қызметтік тексеру басталды. Бұл туралы Абай облысының білім басқармасы хабарлады.
«Заң талаптарын бұзуға жол берген лауазымды тұлғалар тиісті жауапкершілікке тартылады», — делінген облыс басқармасы хабарламасында.
49-мектепте жұмыс істейтін Қуат Айтқали Семейдегі қалалық шырша безендіру кезінде биіктен құлап, реанимацияға түскен еді.
Депутат Асхат Аймағамбет те «Педагог мәртебесі туралы» заңның 6-бабында сүйеніп, мұғалімдерді кәсіби міндеттеріне жатпайтын жұмыстарға тартуға қатаң тыйым салынатынын жазды.
«Жаңа жылдық шырша орнату, көше тазалау, басқа да науқандарға мәжбүрлеп тарту сияқты ескі «дәстүрлерден» біржола бас тартуымыз керек. Бұл – заңды өрескел бұзу» —деді Аймағамбет.
Оқиғаға қатысты жауапты тұлғалар жауапқа тартылу керегін, мұғалімді міндетіне жатпайтын жұмыстарға тартуды тоқтату үшін министрлік бақылауды күшейту керегін, білім басқармалары мен мектеп әкімшіліктері мұғалімдердің құқықтарын қатаң сақтау бойынша міндеттерін орындауы тиіс екенін айтты.
«Мемлекет басшысы әрдайым мұғалімдердің мәртебесін қорғау мен олардың құқықтарын сақтау мәселесін ерекше назарда ұстап келеді. Біздің міндетіміз – сол талаптарды орындап, заңның жұмыс істеуін қамтамасыз ету. Министрліктің бұл мәселені бақылауға алғаны – үміт береді. Жарақат алған әріптесімізге тезірек сауығып кетуін тілеймін», -деді депутат.
Осыған дейін министр Ғани Бейсембаев оқиғаға қатысты текеріс жүргізуді талап етіп, бұл «Педагог мәртебесі туралы» заңға қайшы әрекет екенін атады.
«Семей қаласында мұғалімдерді жаңажылдық шыршаны безендіруге тарту және әріптесіміздің осы іс барысында жарақат алуы – заң бұзушылықтың айқын көрінісі. Педагогтерді кәсіби міндеттеріне жатпайтын мұндай жұмыстарға тарту – «Педагог мәртебесі туралы» заңды өрескел бұзу деп санаймын», – деді министр Ғани Бейсембаев.
Ведомство басшысы білім басқармалары мен бөлім басшыларына заңға сәйкес жұмыс істеуді қатаң ескертті.
«Қуат Айтқалиевтің отбасына шынайы қолдау білдіре отырып, оның тезірек сауығуын тілеймін. Қазіргі уақытта оған барлық қажетті медициналық көмек көрсетіліп жатыр. Бұл жағдай ерекше бақылауға алынды», — деді сендірді министр.
Қазақстанда мұғалімдерді өз міндеттерінен тыс жұмыстарға заңсыз тарту мәселесі әлі де өзекті. 2019 жылы «Педагог мәртебесі туралы» заң қабылданғанымен Білім және ғылым министрлігінің мәліметінше, 2023 жылы мұғалімдерді міндетінен тыс жұмысқа тарту бойынша 200-ден астам іс қозғалған.
Cурет: Pixabay.com
