Алматы қаласында Burger King атымен танымал «QSR» ЖШС-не қатысты жүргізілген тексеру барысында еңбек заңнамасының бұзылғаны анықталды. Бұл туралы Алматы қаласындағы Мемлекеттік еңбек инспекциясы комитетінің департаменті хабарлады.
Тексеру дәмхана қызметкері Қаратай Әлібектің өтінішінен кейін басталған.
Тексеруден кейін жұмыс беруші еңбек заңнамасын бұзғаны анықталды. Атап айтқанда, «QSR» жалақы көлемін шегерген, еңбекақыны кешіктірген, сондай-ақ қызметкерлерді жұмыс уақытынан тыс жұмыс істеуге мәжбүрлеген.
Заңды тұлғаға қатысты Әкімшілік құқық бұзушылық туралы кодекстің 87, 93 және 94-баптары бойынша әкімшілік іс қозғалды.
Айта кетейік, ақпанда Burger King компаниясында жұмыс істейтін аутизмге шалдыққан 27 жастағы Әлібек Қаратайдың жұмыстан қуылғаны мәлім болды. Әлібек дәмханада 4 жыл қызмет атқарған.
2025 жылдың күзінде мейрамхана басшылығына Ресей Федерациясының азаматтары келіп, Әлібек Қаратайды жұмыстан шығарды.
фото: freepik.com
