Қазақстанда тұтынушыларға газ есептегіш көрсеткішін фото арқылы жіберуге мүмкіндік беретін QazaqGaz Aimaq қосымшасы іске қосылды.
Бүгінде қосымшаны жарты миллионнан астам адам жүктеген, деп мәлімдеді Энергетика министрлігі. 500 мың қолданушының 200 мыңы QazaqGaz Aimaq арқылы есептегіш көрсеткішін жолдаған.
Қосымшада тұтыну және төлем тарихын көруге, есептегішті тексеру мерзімі мен жоспарлы жұмыстар туралы хабарламалар алуға болады.
Қазір платформада тұтынушылардың сұрақтарына тәулік бойы жауап беретін виртуалды AI-кеңесші жабық тестілеуден өтіп жатыр.
Айта кетейік, биыл Қазақстанда 10 ауыл мен 32 мың адам газбен қамтылады. Десе де елде әлі көгілдір отынға қол жеткізе алмай отырған 7 млн адам бар.
фото: freepik.com
