Өскемен қаласының бұрынғы әкімі, қазір Шығыс Қазақстан облысы әкімінің бірінші орынбасары қызметін атқаратын Жақсылық Омарға қатысты сотқа дейінгі тергеу басталды. Бұл туралы Ұлттық қауіпсіздік комитеті хабарлады.
Істің мән-жайы туралы ресми ақпарат жоқ.
«Қылмыстық-процестік кодекстің 201-бабының 1-бөлігіне сәйкес өзге ақпарат жария етуге жатпайды», – делінген ҰҚК хабарламасында.
Комитет шенеунікке қатысты бұлтартпау шарасы қолданылған-қолданылмағанын және іс қай бап бойынша қозғалғанын нақтылаған жоқ.
Жақсылық Омар әр жылдары Мәдениет және ақпарат министрлігінде, Қаржы министрлігінде қызмет атқарған. 2018-2024 жылдары Өскемен қаласының әкімі болды, ал 2025 жылдың сәуірінен бастап Шығыс Қазақстан облысы әкімінің бірінші орынбасары қызметін атқарып келеді.
Айта кетейік, қаңтар айының соңында Шығыс Қазақстан облысында 134 млн теңге көлемінде пара алған жолаушылар көлігі және автомобиль жолдары бөлімінің басшысы ұсталды.
