Қазақстандағы ең ірі Теңіз мұнай кеніші өрт пен электр қуатының үзілуінен кейін 7 ақпанға дейін қалыпты шикізат көлемінің жартысынан азын ғана өндіруі мүмкін. Бұл туралы Reuters агенттігі хабарлады.
Chevron жетекшілік ететін Tengizchevroil компаниясы 18 қаңтарда генератордағы өрт салдарынан электрмен жабдықтау үзілген соң Теңіз және Королев кен орындарында өндірісті уақытша тоқтатты. Өрттің нақты себебі әзірге белгісіз.
Энергетика министрлігі Теңізде өндіріс жақын арада жанданады, ал Королев кен орнында жұмыс жалғасып жатқанын мәлімдеді.
5 ақпанға қарай тәуліктік өндіріс 33 мың тоннаға (шамамен 260 мың баррель) жетеді, бұл әдеттегі өндірілетін өнімнің 26%-ын ғана құрайды. Ал 7 ақпанда өндіріс 57 мың тоннаға дейін өсіп, қалыпты көлемнің 46%-ына жетуі мүмкін.
Reuters агенттігінің өзге дереккөзіне сәйкес ақпанның ортасына қарай өндіріс тәулігіне 670 мың баррельге жетеді.
JPMorgan сарапшылары Теңіз кен орны айдың соңына дейін толық іске қосылмауы мүмкін деп санайды және қаңтардағы Қазақстанның мұнай өндірісі орта есеппен тәулігіне 1-1,1 млн баррель болады деп болжап отыр. Әдетте бұл көрсеткіш шамамен 1,8 млн баррельді құрайды.
Айта кетейік, Теңіз кен орнындағы мұнайдың басым бөлігі Каспий құбыр консорциумы (КҚК) арқылы экспортталады, бұл Қазақстан мұнай экспортының 80%-ын құрайды.
фото: istockphoto.com
