Электр ақауына байланысты Атырау облысындағы Теңіз және Королев кен орындарында мұнай өндіру уақытша тоқтатылды. Бұл туралы «Тенгизшевройл» компаниясы Reuters агенттігіне мәлімдеді.
Компанияның хабарлауынша, өндірістің тоқтауына электрмен жабдықтау жүйесіндегі ақау себеп болған. Атап айтқанда, төртінші газ турбиналық электр станциясындағы GT-9.3 трансформаторында өрт шыққан. Апат Теңіз кен орнындағы электр энергиясын тарату желілеріне де әсер еткен.
Өрт 18 қаңтар күні таңертең басталғанымен, бір тәуліктен кейін ғана ауыздықталған.
Қауіпсіздік мақсатында персонал эвакуацияланды, олардың арасында зардап шеккендер жоқ.
фото: istockphoto.com
