Қазақстанда ел ішінде саяхаттайтын турлар аясында балаларға арналған әуе билеттеріне жеңілдік ұсынылады. Бұл туралы Мәжіліс қабылдаған жаңа заң нормасынан белгілі болды.
Құжатта Қазақстан аумағындағы турпакет құрамына кіретін әуе билеттері бойынша кәмелетке толмаған жолаушылар үшін субсидия беру қарастырылған. Түзетулерді таныстырған депутат Никита Шаталовтың айтуынша, бұл шара ішкі туризмді дамытуға бағытталған.
Сонымен қатар заң жобасында шетелдік туристерді тартумен айналысатын туроператорлардың шығындарын әрбір келген турист үшін субсидиялау құралы енгізіледі.
Бұдан бөлек мемлекет туристерді орналастыру нысандарын салу және қайта жаңғырту кезінде кәсіпкерлердің шығындарының бір бөлігін өтеу мәселелері реттеледі.
Айта кетейік, 2025 жылы Қазақстанның қонақ үйлерінде ең көп тұрақтайтындардың көшін Ресей азаматтары бастады. Ал елге келетін қытайлықтар саны 43%-ға артты.
фото: istockphoto.com
