БҚО-да боран кезінде жоғалған үш адамның денесі табылды. Тағы бір тұрғын үш күннен бері іздестріліп жатыр. Бұл жөнінде БҚО полиция департаменті хабарлады.
Жәнібек ауданы Күйгенкөл ауылының 1968 жылғы тұрғыны Е.Өтешов шаруа қожалығында жұмыс істеген. Оның денесі ауыл маңынан табылды. Казталов ауданының тұрғыны, 1990 жылғы жігіт Е.Қонқақовтың да қаза болғаны белгілі болды.
Бөкей ордасы ауданының орталығы – Сайқын ауылыннан шығып кеткен 2000 жылғы Е. Қажығалиев Далбын қыстағы маңында боранда үсіп қалған. Аудандық ішкі саясат бөлімі берген ақпарат бойынша жас жігіт шизофрения ауруына шалдыққан. Төтенше жағдай, мемлекеттік орган қызметкерлері және еріктілер іздестіру жұмысын жүргізіп, Қажығалиевты демі үзілген жерден тауып алды.
ПД мәліметіне сай Жәнібек ауданы Күйгенкөл ауылының Бұқар қыстағынан 13 желтоқсан күні кешкі сағат 20:39-да шығып кеткен 1971 жылғы М. Еділбаев табылған жоқ. Ал Ақжайық ауданында суыққа үсіп қалған 1971 жылғы тұрғын Т. Ілиясов Орал қаласына жеткізілмек.
Айта кетейік, 13-14 желтоқсан күндері БҚО-да боран соғып, автокөліктер жолы жабылды. Жел екпінінен кейбір нысандардың шатыры жерге құлап, боранда адамдар адасып қалып жатқаны туралы хабар тарады.
