Қазақстанда сыбайлас жемқорлықтың алдын алуға бағытталған жаңа стандарт қоғамдық талқылауға түсті. Бұл туралы Сауда және интеграция министрлігі хабарлады.
Қызметкерлер сыйлықтар мен «қонақжайлылыққа» жататын сияпатты қабылдаудан бас тартуы керек. Азаматтық кодекске сәйкес, мемқызметкерлер құны 10 АЕК-тен (39 320 теңге) асатын сыйлықтарды қабылдай алмайды.
Мемлекеттік сатып алу кезінде жеке мүдделердің ықпалына жол берілмейді, делінген министрлік хабарламасында. Айта кетейік, қазір 2022 жылы 329,5 млн теңгеге 43 су резервуарын сатып алып, 3 жылда бірде-бір рет қолданбаған «Батыс су арнасына» қатысты тексеріс жүріп жатыр .
Сонымен қатар министрлік кірістер декларациясын кеш тапсырған мемлекеттік қызметкерлерді жауапкершілікке тартуға мүдделі.
Жұмысшыларға жыл сайын сыбайлас жемқорлықтың алдын алу бойынша дәрістер өткізілмек. Оқытудан кейін олар тест тапсыруға міндетті. Сұрақтардың 60%-на дұрыс жауап берген қызметкер емтиханнан өте алады.
Стандартта кадрлық іріктеудің ашықтығы, мемлекеттік сатып алулардағы бәсекелестікті қамтамасыз ету және есептілікті арттыру тетіктері де қамтылған.
2025 жылдың басында сыбайлас жемқорлықтың алдын алу үшін жаңа заң жобасы әзірленетіні белгілі болды. Жемқорлыққа қарсы іс-қимыл агенттігі төрағасының бірінші орынбасары қызметін атқарған Ұлан Сарқұлов пара туралы уәделескендерді жазалап, жемқорлар тізімін жария етуді ұсынды.
Биыл қаңтар айында «Сыбайлас жемқорлыққа қарсы іс-қимыл туралы» заңға «Мүдделер қақтығысы» туралы тарау енгізіледі. Тарауда мемлекеттік қызметшілер мен олардың басшылары арасында мүдделер қақтығысы туындаған жағдайдағы жауапкершілігі көрсетілмек.
