2025 жылы жұмысшы мамандарға арналған «Наурыз Жұмыскер» тұрғын үй несиелеу бағдарламасы қайта іске қосылады. Өтінім қабылдау 3 қарашадан басталады, бұл туралы «Отбасы банк» хабарлады.
Бағдарлама өнеркәсіп, құрылыс, энергетика, көлік, ауыл шаруашылығы және су ресурстары салаларында еңбек ететін жұмысшыларға арналған.
Бұған дейін «Наурыз Жұмыскер» бағдарламасымен 1800 адам пәтер алды.
Несиелеу мөлшері Астана мен Алматыда 36 млн теңгеге дейін, облыс орталықтарында 30 млн теңгеге дейін жетеді. Бастапқы жарна 10-20%, несие мөлшерлемесі 7-9% аралығында белгіленген.
Бағдарлама аясында биыл 50 млрд теңге көлемінде қаржы бөлініп, 2 мың несие беру жоспарланған. Қатысушылар өтінімді банк бөлімшелерінде тапсыра алады.
Қатысу үшін үміткердің басында тұрғын үй болмауы керек. Кейін өтінім беруші депозит ашып, оны 2 млн теңгеге дейін толықтыруға тиіс.
фото: freepik.com
