Қаржы монтиорингі агенттігі БҚО департаменті «Imrat Group» қаржы пирамидасын әшкереледі. Агенттік пирамида қызметі тоқтатылғанын хабарлады.
Алаяқтық схема бойынша компания инвестиция тартумен шұғылданған. Компания қызметкерлері 0,5%-дан 1,5%-ға дейін жедел өсім беретін «кіріс көзін» ұсынды.
Пирамида ашылғаннан кейін 30 азамат 90 млн теңге салып үлгерді.
Ұйымдастырушылар тұрғындарға «Imrat Group» – Канаданың, Гонконг пен Ұлыбританияда тіркелген халықаралық компания деп сендірді. Пирамида ұйымдастырушылары кеңселерді жалға алып, конференциялар өткізді. Тіпті телеграм арқылы «есеп беріп» отырды.
«Қатысу үшін азаматтар арнайы реферальды сілтеме арқылы тіркеліп, криптовалюта әмиянына 20-дан 10 000 АҚШ долларына дейін (USDT баламасында) қаражат аударуы қажет болған», – деп хабарлады ҚМА.
Шын мәнінде, қаржылық салымдар тұтынушыларға қайта бөлінді. Алданған азаматтар өз ақшаларын өздеріне төлеп отырғандарынан хабарсыз болған.
Оқыңыз:
Батысқазақстандықтар 1,1 млрд теңгесін қаржы пирамидаларына салған
ҚМА деректері:
- 2025 жыл басталғалы 31 қаржы пирамидасына қатысты 90 сотқа дейінгі тергеп-тексеру аяқталды;
- 7 млрд теңге көлемінде залал өтелді;
- жалған инвестициялық жобалар туралы ақпарат таратқан 14 мыңнан астам интернет-ресурс бұғатталды;
- Instagram мен Telegram платформаларында 535 мыңға жуық қатысушысы бар 100-ден астам заңсыз чаттар жабылды.
фото: pixabay
