Ішкі істер министрі Ержан Сәденов алкогольдік ішімдіктерді тек шектеулі орындарда сатуды ұсынды. Бұл мәселе ведомствоаралық комиссия отырысында талқыланған.
Министр арақ-шарапты алкомаркеттерде ғана сату керек деп есептейді. Егер бұл ұсыныс қабылданса, азық-түлік дүкендердерде және басқа ірі сауда желілерінде ішімдіктер сөреден алынып тасталынады.
Сәденов спиртті сусындардың онлайн саудасына шектеу қоюды құптайды. Оған қоса лицензия беру талабын қатаңдатқан жөн деді.
Министр кәсіпкерлердің алкогольдік өнімдерді сатқан кезде адамдардың жас ерекшелігін және уақытын ескере бермейтінін алға тартты. Бір жылда адамдар мас күйінде жасайтын құқықбұзушылық саны 10 000-ға жетіп жығылады. Арақ-шараппен көңіл көтеретін орындарда 1400 қылмыс тіркелді. Үш қылмыстық оқиға адам өлімімен аяқталды.
Дегенмен Сәденов бұл ұсынысқа бірқатар мемлекеттік органдар қарсы екенін айтты.
Орал қалалық қоғамдық кеңес мүшесі Нұрлан Сәдір де министр ұсынысы тиімсіз деп есептейді.
«Өз басым қоғамның ішімдікке әуес болуын құптамаймын. Бірақ бұлай шектеу қоюдың қаншалықты пайдасы бар екенін зерттеу керек. Ішімдік тұтынатын адам бәрібір арақ-шарапты іздеп табады. Есесіне заңсыз сауда айналымы ұлғаюы мүмкін. Құрамы белгісіз спирттік сусындар сатыла бастайды. Одан адамдар уланып, ауырып қалуы мүмкін. Содан кейін қымбат дәрі-дәрмек алады. Меніңше, балама жолдарды іздеу керек. Мысалы, қымыз өндірісін дамыту қажет. Қазіргі балқымыздардың құрамы күмәнді. Одан да табиғи қымыздар дәмханаларда жиірек сатылсын. Бағасы арзан болса, нарыққа өтеді. Адамдардың едәуір бөлігі арақ-шараптан бас тартары анық», – дейді Нұрлан Сәдір.
Оқыңыз:
БҚО-да «Yandex», «Wolt», «InDrive» курьерлеріне түнде ішімдік тасымалдауға тыйым салынды
Экономист Ғазиз Әбішев азық-түлік нарығында алкогольдік өнімдер бағасын көтерсе, инфляция күшейетіні туралы жазды. Сарапшы пікірінше, қазірдің өзінде дүкендер ішімдік есебінен біраз табыс тауып отыр. Егер арақ саудасына мүлдем тыйым салынса, сауда орындары мүлдем жабылады немесе азық-түлік бірден қымбаттайды.
«Бизнесін сақтап қалу үшін дүкендер жасырын сауданы күшейтеді. Ал алкомаркеттердің айы оңынан туады. Барлық қалада кәсібін дөңгелетеді. Капитал алкобарондардың қолына шоғырланады», – дейді сарапшы.
фото: pixabay
