Белсенділер талабынан кейін Алматыдағы №215 мектеп оқушыларды қазақ тілінде оқытады. Бұл ақпарат әлеуметтік желілерде тарады.
Алматыда жаңа мектептің тек қазақ тілінде білім беруін керек екенін айтқан математика пәнінің мұғалімі Дархан Ардақұлы «жергілікті органның рұқсатынсыз бейбіт жиналыс өткізуге шақырды» деген айыппен 15 тәулікке қамалды.
Жергілікті білім басқармасы жаңадан салынған №215 мектепті қазақ және орыс тілдерінде аралас білім береді деп жоспарлаған. Алайда мектеп орналасқан Бостандық ауданының ата-аналары бұл шешіммен келіспеді. Олардың айтуынша, ауданда орыс тілінде білім беретін мектептер қазақтілді мектептерден көп.
Посмотреть эту публикацию в Instagram
Жағдайдан хабардар болған белсенділер желіде жаңа мектептегі оқыту жүйесін толық қазақ тілінде бастауға үндеді. Олардың бірі – Алматы мектептерінің бірінде математика пәнінен сабақ беретін Дархан Ардақұлы.
Бір топ ата-ана Бостандық ауданында қазақ тілді мектептер сирек екенін айтып, білім басқармасына шағымданған.
Алматы қалалық әкімшілік соты 22 тамызда Дархан Ардақұлын уақытша ұстау изоляторына қамады. Мәжіліс депутаты Абзал Құспан соттың бұл шешімімен келіспейтінін мәлімдеген.
«Сот қаулысы заңсыз ғана емес, сонымен қатар қоғамда араздық тудыруға бағытталған провокациялық сипатқа ие! Дарханды бар болғаны «№ 215 мектепке барамыз» деген бір ауыз сөзі үшін қамауға алған! Сот мұны «митингке шақыру» деп бағалап отыр.
Менің адвокаттық тәжірибемде халықты сот отырысына келіп қолдауға талай рет шақырған жағдайлар болды. Қазақ тілі мәселесіне қатысты сот залдары халыққа лық толған кездер де бар. Бірақ мені ешқашан «Митингке шақырды» деп айыптаған емес», — деп жазды Абзал Құспан.
Қаланың білім басқармасы бұл жағдайға қатысты ресми түсініктеме берген жоқ.
Алматыдағы Бостандық ауданы білім бөлімінің басшысы Айгүл Қасымбек мектепке қатысты көтерілген дауды «асыра сілтеу» деп бағалаған. Бөлім басшысы zhasalash.kz сайтына берген сұқбатында мегаполисте 26 991 бүлдіршін бірінші сыныпқа қабылданғанын айтқан. Бірақ соның 40%-ы орыс және басқа тілде оқытатын сыныптарды таңдаған.
Қазіргі кезде Алматыда 62 қазақтілді, 46 орыстілді және 195 аралас мектеп жұмыс істейді, деп жазды Factcheck.kz.
Ақпарат құралдары таратқан тағы бір дерек бойынша Қазақстанда бес жылда орыс мектептерінің саны 190-ға қысқарған. Ал Қызылорда, Ұлытау облыстары мен Шымкент қаласында орыс тілінде оқытатын бірде-бір мектеп қалмаған.
Оқыңыз:
Тайпақ ауылының тұрғындары неге орыс сыныбын ашуды сұрап отыр?
Өңірлік коммуникация қызметінің ақпаратына сүйенсек, биыл Батыс Қазақстан облысында 1-сыныпқа баратын 12,4 мың оқушының 75%-ы қазақ тілінде білім алады.
Sarapshy.info БҚО-дағы мектептердегі ахуалды сұрап, білім басқармасына сауал жолдады.
фото: 2gis.kz
