Батыс Қазақстан облысы Теректі ауданының Ақжайық ауылында Жайық өзеніне батып бара жатқан 13 жастағы қызды құтқарған кезде екі мұғалім суға кетті. Ауыл тұрғындары оларды марапаттауды сұрап отыр. Бұл туралы белсенді азамат Бекзат Сәбитов Facebook парақшасында хабарлады.
Қайғылы оқиға 10 шілдеде болған. Абай ауылындағы мектептің ағылшын тілі мұғалімі, 37 жастағы Қанат Шайхиденов пен Астана BINOM мектебі физика пәнінің мұғалімі, 25 жастағы Бекарыс Аминов жасөспірім қызды судан алып шығып, өздері жағаға қайтадан жүзіп шыға алмаған.
Қанат отбасымен өзен жағасында демалып жүрген, ал Бекарыс ауылына демалысқа келген. Екі азамат бірін-бірі жеке танымайды. Суға батып бара жатқан қыз Бекарыс Аминовтың туысқаны болған. Ол суға батып бара жатқан қарындасын көріп суға жүгіреді, сол жерде жүзіп жүрген Қанат Шайхиденов те көмек көрсетуге тырысады.
«Ерлікпен қаза тапқан ержүрек әкесінің жантәсілім сәтін өз көзімен көрген жары мен бес баласы өң мен түстің арасында аңырып қала берді. Қыршын кеткен екі жас та қысылтаяң сәтте өз бастарын қатерге тігіп, өзгенің өмірін құтқару үшін көзсіз ерлікке бара білді. Боздақтардың осы ерлігі ескеріліп, жергілікті атқарушы билік тарапынан қолдау тапса дейді ауыл тұрғындары», — делінген Facebook-тағы жазбада.
Қанат Шайхиденов – жоғары санатты ұстаз, бес баланың әкесі, оның тұңғышы – ерекше бала, кенжесі үш айлық. Ал Бекарыс Аминов тамыз айында үйленгелі отырған.
Ауыл тұрғындары ұстаздардың ерлігін атап өтіп, отбасыларына қолдау көрсетуді сұрап отыр.
Бекзат Сәбитов Sarapshy.info редакциясына берген сұхбатында марқұмдарды марапаттау үшін Төтенше жағдайлар министрлігіне хат жолдағанын айтты.
«Оқиға болған күннен батап Қанат Шайхиденовтың артынан қалған бес баласына барынша қолдау көрсетіп, қаражат жинап жатырмыз. Өкініштісі, өзен маңында суға түсуге тыйым салынғанын ескертетін еш белгі жоқ. Былтыр осы жерде тағы бір адам суға батып кетті. Өзеннің арғы бетінде төтенше жағдайлар қызметінің қызметкерлері демалып жүрген. Олар суға батып бара жатқан адамдарды көріп, барынша көмектесуге тырысқан…», – деді ол.
Осы жазда БҚО-да 23 адам суға батып кеткен. Олардың бесеуі кәмелет жасына толмаған. Бұл туралы өңірлік ТЖ қызметі хабарлады.
фото: istockphoto.com
