Ақтөбе облысына қарасты Хромтау ауданында Мағажан су тасқынының алдын алуға немқұрайлықпен қараған маманға қатысты тергеу аяқталды. Бұл туралы Қаржы мониторингі агенттігінің облыстық департаменті хабарлады.
Естеріңізге сала кетейік, 2025 жылдың ақпанында еріген қар суының жоғары деңгейінен Мағажан су қоймасының бөгеті жарылды. Апат салдарынан Табантал, Қызылту және Бесқоспа ауылдарын су басты.
Тергеу нәтижесінде жергілікті әкімдік қызметкері өз міндеттерін тиісті деңгейде орындамағаны анықталды. Ол бөгеттің техникалық жағдайын бақыламаған, нақты тексерістер жүргізбеген және апаттың алдын алу үшін шара қабылдамаған.
Қызметкердің салғырттығынан Ілек және Қарғалы өзендері маңындағы саяжайлар да су астында қалды.
Апаттан келтірілген жалпы шығын 211 миллион теңгені құрайды. Сот айыпталушыны 1 жыл 6 айға бас бостандығынан айыру туралы үкім шығарды.
Батыс Қазақстан облысында да су тасқынына дайындық кезінде олқылық жіберген аудан әкімі мен қала әкімдеріне сөгіс жарияланып, бірқатар басқарма басшыларына ескерту жасалды.
фото: видеодан скриншот
