Қазақстан аумағында салынатын 3 атом электр станциясының екеуінің құрылысына Қытайдың CNCC компаниясы жауап береді. Бұл туралы премьер-министрдің бірінші орынбасары Роман Скляр үкіметтің баспасөз отырысында хабарлады.
China National Nuclear Corporation – 1955 жылы Қытайда құрылған мемлекеттік кәсіпорын. 2019 жылдың қорытындысы бойынша CNCC жалпы қуаты 60 ГВт болатын 59 зауыт салған.
Бірінші станцияны Балқаш көлі маңындағы Үлкен ауылында ресейлік «Росатом» тұрғызбақ. 20 маусым күні Ресейде өткен халықаралық экономикалық форумда ҚР Атом энергиясы жөніндегі агенттігі мен «Росатом» атом электр станциясын салу туралы құжатқа қол қойды. Ресейлік компания АЭС құрылысын 10-12 жыл жүргізеді.
Қазір Атом энергетикасы агенттігі мен «Қазақстандық атом электр станциялары» компаниясы қалған 2 АЭС-ті салуға қолайлы аймақтарды анықтап жатыр.
2025 жылдың наурыз айында IV Ұлттық құрылтай отырысында президент елімізде толық ядролық кластер құру үшін 3 АЭС салынатынын атап өтті.
фото: freepik.com
