23 маусым күні Бөкей ордасы ауданының орталығы — Сайқын ауылының үш шақырым жерде «Шахман» жүк көлігі пойызбен соқтығысты. Жүк көлігін тізгіндеген 1958 жылғы адам ауыр жарақат салдарынан көз жұмды.
БҚО полиция департаментінің мәліметі бойынша темір жол өткелінде аутокөлік жүргізушісі жүк тепловозына жол бермеген.
«Жол-көлік аты кезінде «Шахман» көлігінің жүргізушісі сол жерде көз жұмды. ҚР Қылмыстық кодексінің 344-бабы 2-бөлігі бойынша сотқа дейінгі тергеу басталды. Оқиғаның барлық мән-жайы анықталуда», – деп хабарлады ПД баспасөз қызметі.
БҚО төтенше жағдай департаментінің мәліметі бойынша тепловозға 90 вагон тіркелген. Жүк құрамында сұйытылған газ болған.
«Бұдан әрі қауіп-қатердің алдын алу және қозғалыс қауіпсіздігін қамтамасыз ету үшін пойыз вагондары зақымданған локомотивтен жедел ағытылып, темір жолдың қауіпсіз учаскесіне жеткізілді. Алдын ала мәліметтер бойынша сұйытылған газдың ағып кеткені туралы ақпарат тіркелмеді, бұл экологиялық және техногендік қауіптерді болдырмауға мүмкіндік берді», – деп мәлімдеді ТЖД.
фото: pixabay
