Үкімет желтоқсан айында салалар бойынша жыл ішінде атқарылған іс-шаралар қорытындысын ұсына бастады.
Биыл бюджеттің басым бөлігі әлеуметтік салаға, үй құрылысына және «Ұлттық қор – балаларға» бағдарламасына бағытталған.
Үкімет хабарламасында, базалық зейнетақы мөлшері 7%-ға, ынтымақты зейнетақы 9%-ға көбейгенін, барлығы 2,4 млн адам, оның ішінде жинақтаушы зейнетақы жүйесінің 459 мың қатысушысы қамтылғаны көрсетілген. Орташа зейнетақы көлемі 165 мың теңгеден асты. Экономика министрлігі келесі жылы да зейнетақы мен әлеуметтік жәрдемақылардың өсетінін мәлімдеген еді.
«Ал 2024 жылдың 1 қаңтарынан бастап ең төменгі жалақы 85 мың теңгеге дейін артты. 1,8 млн адам, оның ішінде бюджет қызметкерлері қамтылды. 600 мың азаматтық қызметшілердің жекелеген санаттарының жалақысын кезең-кезеңімен 20%-ға арттыру жалғасуда» — делінген хабарламада.
Тұрғын үй және инфрақұрылым саласында да жыл соңына дейін 18 млн шаршы метр тұрғын үй салынған, бұл 1 млн-нан астам отбасыны қамтуға мүмкіндік берді. Сонымен қатар лифтілерді жаңарту және тұрғын үйлердің инфрақұрылымын жақсарту бойынша 200-ден астам жоба жүзеге асырылып жатыр.
«Ұлттық қор – балаларға» бағдарламасы
2024 жылдан бастап іске қосылған бұл бағдарлама Ұлттық қордың инвестициялық табысының 50%-ын 18 жасқа дейінгі балаларға арнайы жинақтау шоттарына аударуды қарастырады. Жыл басынан бері $695,5 млн есептелді. 18 жасқа толғандарға $30,6 млн төленеді, олар бұл қаражатты тұрғын үй сатып алуға немесе білім алуға пайдалана алады. Келесі жылдан бастап Ұлттық қордан балаларға берілетін сыйақы мөлшері 100 доллардан асататынын жазған едік.
Сонымен қатар «Ауылда денсаулық сақтауды жаңғырту» жобасы аясында 655 медициналық нысанның құрылысы жоспарланып, 251 нысан пайдалануға берілді. Жобаның негізгі мақсаты шалғайдағы ауылдарды сапалы медициналық қызметтермен қамтамасыз етіп, жұмыс орындарын ашуға мүмкіндік болды. Дәрі-дәрмектерді қолжетімді ету үшін дәрілік заттар мен медициналық бұйымдарды есепке алу жүйесі цифрланғанын да айтты үкімет.
Білім беру саласында да ауылдық жерлерде заманауи мектептер ашылып, балабақшалар салынды. ЖОО студенттері, магистранттар мен докторанттар үшін шәкіртақы өсті. Бакалавр стипендиясы 20%-ға, ал педагогикалық және медициналық бағыттағы студенттер үшін 75,6 мың теңгеге дейін артқан.
Президент Қасым-Жомарт Тоқаев «2025-2027 жылдарға арналған республикалық бюджет туралы» Қазақстан Республикасының заңына қол қойды. Бұл құжат алдағы үш жылдағы елдің әлеуметтік-экономикалық дамуының негізгі қаржылық көрсеткіштерін айқындайды.
Негізгі көрсеткіштер:
- Ең төменгі жалақы: 2025 жылдың 1 қаңтарынан бастап 85 000 теңге болып белгіленді.
- Айлық есептік көрсеткіш (АЕК): 3 932 теңге.
- Мемлекеттік базалық зейнетақы төлемінің ең төменгі мөлшері: 32 360 теңге.
- Ең төменгі зейнетақы: 62 771 теңге.
- Ең төменгі күнкөріс деңгейі: 46 228 теңге.
- Зейнетақы төлемдерінің өсуі: Жасына байланысты және еңбек сіңірген жылдары үшін зейнетақы төлемдері 8,5%-ға ұлғайтылады.
Сурет: gov.kz
