Қазақстанда 20 және 22 жастағы екі қыз он жылға сотталды. Олар интернет арқылы жұмыс істеп, ақша таппақшы болған. Арнайы тапсырмаларды орындаған.
«Егер сіз жұмыс іздеп курьер (бөлшектеуші, таратушы, кладмен, трафаретші) ретінде жоғары ақы төленетін жұмысқа ұсыныс алсаңыз, ойланыңыз. Өйткені аталған жарнама есірткі бизнесіне тартуды жасырын көздеуі мүмкін. Сізді жалған табыс туралы хабарландырулардағы сөздер алаңдатуы қажет. Бұл есірткі сатушылардың айласы», — деп жазады Бас Прокуратура.
Белгілі болғаны, 20 және 22 жастағы екі бойжеткен «жеңіл ақша» табуға шешім қабылдап, интернетте ақша табудың оңай жолын тапқан.
Қылмыстық жоспарға сәйкес кураторлардың көрсеткен мекенжайлары бойынша психотроптық заттар мен олардың аналогтарын алып, оны бөлшектеп орап, таратқан.
«Сотталушылар жалға алған тұрғылықты пәтерден өлшеп оралған 50 грамнан астам мефедрон тәркіленді. Сот үкімімен сотталушылардың әрқайсысы 10 жылға бас бостандығынан айырылды», – делінген хабарламада.
Бас прокуратура көп ақша төлейтін жұмысқа ұсыныс түссе, ойланыңыз деп ескертеді.
Қазан айы басталғалы 54 есірткі қылмысы анықталды
Елде қазан айының басынан бастап 54 есірткі қылмысы анықталды. Оның ішінде есірткі сатудың 29 фактісі, аса ірі мөлшерде сақтаудың жеті фактісі, үш контрабанда фактісі және құрамында есірткі бар өсімдіктерді өсірудің жеті фактісі бар.
ІІМ-нің дерегіне сүйенсек, тәркіленген есірткінің жалпы салмағы 250 килограмнан асады. Бұған 214 кг марихуана, 5 кг гашиш және 31 кг синтетикалық есірткі кіреді.
Сурет: inbusiness.kz
