Желтоқсан айында Ресейден Қазақстанға бағыт алып, Ақтау маңында құлаған Azerbaijan Airlines жолаушылар ұшағынан Ресейдің «Панцирь-С» әуе қорғаныс жүйесі атқан зымыран жарықшағы табылған. Бұл туралы Әзербайжан үкіметінің дереккөзіне сүйеніп Reuters агенттігі хабарлады.
Әзербайжанның Цифрлық даму және көлік министрлігінің мәліметінше, әуе кемесі техникалық тұрғыдан ұшуға толық жарамды болған, алайда оған «сырттан тиген заттар» зақым келтірген.
Қазақстанның көлік министрлігі де 4 ақпан күні Azerbaijan Airlines әуекомпаниясының жолауылар ұшағы апатын тергеу барысындағы алдын ала қорытындысын ресми сайтында жариялады.
«Azerbaijan Airlines ұшағының үшінші гидрожүйе бөлімі мен стабилизаторын басқару механизмінде тесілген зақымданулар анықталды. Зерттеу нәтижесінде зақымдардың көпшілігі киль мен стабилизаторда орналасқаны және олардың кейбірі толық тесіп өткен, ал кейбірі жартылай бүлінгені белгілі болды. Тергеу комиссиясы бөгде заттарды алып, оларды қосымша сараптамаға жіберді. Нәтижесінде, ұшақтың зақымданған бөліктерінен көп мөлшерде бөгде металл заттар табылды», —делінген есепте.
53 беттік есепте ұшақтың апатқа ұшырауына нақты себеп айтылмаған. Анықталған бірнеше фактілер мен себептерді көрсеткен. Ұшақтың ішіне тесіп өткен қатты заттардан бөлек, радио байланыс жазбалары бойынша, басқару жүйесінде ақаулар болғанын да жазған. Авиациялық апаттың нақты себебі бойынша тергеу әлі жалғасуда.
Azerbaijan Airlines компаниясының Embraer ERJ 190-100 ұшағы Бакуден Грозныйға бағыт алған. Есепте ұшақ бортындағы экипаж мүшелерінің сөздері мен апат алдындағы бағыты туралы көрсетілген.
Грозныйға екі рет қонуға талпынғанымен, сәтсіз болған. Экипаж Бакуге оралуды шешкен, бірақ Грозныйда неге қона алмағаны туралы есепте нақты мәлімет жоқ.
- Ұшақ қайта көтерілген кезде (05:13:30 UTC) GPS сигналдары жоғалып кетті. Бір секундтан кейін «соққы дыбысы» тіркеліп, автопилот пен тартқыш жүйе істен шықты.
- Гидравликалық жүйе жұмысын тоқтатып, басқаруға көнбеген.
- 05:13:39 – ұшақ кабинасында саңылау пайда болған.
- 05:13:56 – екінші «соққы дыбысы» естіліп, экипаж жолаушылар орындықтарының зақымданғанын хабарлаған.
- Экипаж Қазақстанға бағыт алды, бірақ жолаушылар оттегі жетіспеуі мен жанармай иісінің тарауын айтқан. Кейбір жолаушылар есінен танған.
- 06:27:58 – ұшақ Ақтау маңында құлап, толық жанып кеткен.
Естеріңізге сала кетейік, 25 желтоқсан күні, таңертең Azerbaijan Airlines әуе компаниясына тиесілі Embraer 190 жолаушылар ұшағы Бакуден Грозныйға ұшу кезінде Ақтау қаласынан 3 шақырым жерде құлады. Ұшақ бортында болған 67 жолаушының 38-і қаза тапты, 29-ы Ақтаудағы ауруханаға жеткізілген еді. Әуе кемесінде болғаг Қазақстанның 6 азаматы да қаза тапты.
Әзербайжан Президенті Әлиев ұшақ апатына Ресейді кінәлап, жауапкершілік солардың мойнында екенін айтқан еді. Президент мәлімдемесіне дейін Euronews Әзербайжан үкіметіндегі дереккөздерге сілтеме жасап, Ақтаудағы ұшақ апатына Грозный аспанына көтерілген Ресей зымыраны себеп болғанын хабарлады.
Сурет: gov.kz
