Қытайлық компания Алматы облысында қуаттылығы жылына 300 000 тонна болатын астықты терең өңдейтін зауыт салады. Жоба еліміздің агроөнеркәсіп кешенін дамыту аясында жүзеге асырылып жатыр.
Жобаның инвесторы – қытайлық CITIC Construction компаниясы.
Бүгін ауыл шаруашылығы вице-министрі Ермек Кенжеханұлы ҚХР делегациясының өкілдерімен кездесті.
Жаңа зауыт мальтозалық шырын, фруктозалық шырын, кристалды фруктоза, аллюлоза, кристалды дектроза, натрий глюканаты және басқа да өнімдер шығаратын болады.
Инвестицияның жалпы көлемі шамамен – 1,07 миллиард АҚШ доллары, ал өнімнің жалпы құны – 1,87 миллиард АҚШ долларын құрайды. Сондай-ақ 2 000-нан астам жұмыс орнын құру жоспарланған.
Зауыттың салынатын орны да белгілі. Нысан Алматы облысындағы «Қазбек бек» индустриалды аумағында бой көтереді. Қазіргі уақытта зауытты қажетті инфрақұрылыммен уақтылы қамтамасыз ету мәселесі шешіліп жатыр.
Айтып өтелік, қазір еліміздің аумағында қытай капиталының қатысуымен 3 000-ға жуық бірлескен компания табысты жұмыс істеп жатыр. Олардың төрттен біріне жуығы соңғы жылы ғана қосылған.
2005 жылдан бастап Қытайдан Қазақстанға құйылған жалпы инвестиция көлемі 25 млрд АҚШ долларына жуықтаған. Тек өткен жылы тікелей қытайлық инвестициялар көлемі 15%-ға өсіп, 1,6 млрд АҚШ долларынан асты.
Бүгінде бірлескен инвестициялық жоба саны 90-нан асып, энергетика, тау-кен металлургия кешені, машина жасау, электротехника, ауыл шаруашылығы, көлік инфрақұрылымы, білім беру, туризм және басқа да салаларды қамтиды.
Қос ел арасындағы сауда айналымы көктемде 40 млрд долларға жетіп, рекорд орнады.
Сурет: freepik.com
