«ҚТЖ-Жүк тасымалы» ЖШС-на 1,42 млрд теңге айыппұл салынады. Бұл жөнінде Бәсекелестікті қорғау және дамыту агенттігі хабарлады.
«ҚТЖ-Жүк тасымалы» ЖШС-на бәсекелестікті қорғау туралы заңнаманы бұзу белгілеріне қатысты тергеп-тексеру аяқталды.
Тексеріс жүргізуге ҚР Ұлттық экспедиторлар қауымдастығының, Қырғыз Республикасы Экспедиторлар қауымдастығының және бірқатар көлік-экспедиторлық компанияларының өтініштері негіз болған.
Агенттік дерегінше, «ҚТЖ-Жүк тасымалы» ЖШС жүк тасымалдау жоспарларын келісу барысында аффилиирленген компанияларға – «KTZ Express» АҚ және «КедентрансСервис» АҚ-на артықшылық беріп, жеке экспедиторлық ұйымдардың қызметіне кедергілер жасағаны анықталды.
«Аталған әрекеттер «ҚТЖ-Жүк тасымалы» ЖШС тарапынан монополиялық жағдайды теріс пайдалану ретінде бағаланды. Астана қаласының әкімшілік құқық бұзушылық істері жөніндегі мамандандырылған ауданаралық сотының 2025 жылғы 22 тамыздағы шешімімен «ҚТЖ-Жүк тасымалы» ЖШС Қазақстан Республикасының Әкімшілік құқық бұзушылық туралы кодексінің 159-бабы 3-1-бөлігі бойынша әкімшілік жауапкершілікке тартылып, мемлекет кірісіне 1,42 млрд теңге айыппұл төлеуге міндеттелді», – делінген хабарламада.
2025 жылғы 15 қыркүйектегі Астана қалалық сотының қаулысымен бірінші сатыдағы соттың шешімі өзгеріссіз қалдырылды.
«Қазақстан темір жолы» ұлттық компаниясы бірінші сатыдағы сотта «ҚТЖ-Жүк тасымалы» ЖШС-ның Бәсекелестікті қорғау және дамыту агенттігінің Астана қаласы бойынша департаменті тергеу қорытындыларын заңсыз деп тану туралы талабын қарау жалғасып жатқанын хабарлады.
Компания дерегінше, тергеу заңдылығы туралы мәселе ашық күйінде қалып отыр. Іс бойынша түпкілікті шешім әлі қабылданған жоқ.
Еске салайық, осыған дейін Бәсекелестікті қорғау және дамыту агенттігі Қазақстандағы 11 әуежайға қатысты тергеп-тексеру бастаған еді. Себебі әуе керосиннің көтерме және бөлшек сауда нарығына жүргізген талдау нәтижесінде отын құнының негізсіз өсуі анықталды.
Сондай-ақ агенттік «G Motors Uralsk» шартынан заңбұзушылықты анықтады. Агенттік мәліметі бойынша Geely ресми дистрибьюторының заңсыз әрекеті жөнінде тұтынушылар шағымданған.
Ал Қарағанды қаласында Jetour және Geely компаниялары қызметінде заңбұзушылық анықталды. Тұтынушылар ресми дилерлердің талабы заңсыз екенін айтып, департаментке шағымданған.
Фото: ҚТЖ
