Қазақстанның курорттық аймақтарында жүргізілген тексеріс нәтижесінде вице-министрлерден бастап ауыл әкімдеріне дейін тәртіптік жауапкершілікке тартылды. Бұл туралы үкіметтің баспасөз қызметі ақпарат таратты.
Шілде айында Тоқаев Алакөлде туристерге арналған инфрақұрылымның жетілдірілмегенін, шағымның көп айтылып жатқанын сынады.
Қоғам Көшербаевты да сынады
Президент тапсырмасынан кейін премьер-министрдің орынбасары Ермек Көшербаевтың жетекшілігімен ведомствоаралық жұмыс тобы құрылды. Оның құрамына туризм, көлік, ішкі істер, экология, су ресурстары, денсаулық сақтау сынды бірқатар министрліктің және өзге де мемлекеттік органдардың өкілдері енді.
10-12 шілде аралығында жұмыс тобы Қапшағай су қоймасы, Алакөл және Балқаш көлдеріндегі туристік инфрақұрылымды тексерді. Туристермен бетпе-бет кездесіп, олардың сервистің сапасыздығы мен қауіпсіздіктің жоқтығына қатысты шағымдарын тыңдады. Аймақтарда көптеген заң бұзушылық анықталды.
Бірақ Алакөлге барған Көшербаевтың өзі сынға ілікті. Әлеуметтік желілерде көпшілік «ШҚО әкімі орынбасары болған кезде неге туризмге көңіл бөлмеді?» деген пікірлер жиі жарияланды.
Жағажайлар абаттандырылмаған, чек жоқ, санитария сын көтермейді
Коммуналдық жағажайларда абаттандыру талаптарының бұзылғаны, көлеңке мен қоқыс жәшіктерінің жетіспейтіні, чек бермейтін кәсіпкерлер мен санитарлық талаптарды елемейтін демалыс орындары бар екенін анықталды. Қауіпсіздік ережелері жиі сақталмайды — құтқару бекеттері жетіспейді, алғашқы көмек көрсету мүмкіндіктері шектеулі.
Кімдер жауапкершілікке тартылды?
Тексеру қорытындысы бойынша бірқатар лауазымды шенеунікке тәртіптік жаза қолданылды:
-
Туризм және спорт вице-министріне және Алматы, Қарағанды, Абай, Жетісу облыстары әкімдерінің орынбасарларына қатаң сөгіс жарияланды;
-
Қонаев, Балқаш қалаларының, сондай-ақ Алакөл мен Мақаншы аудандары және ауылдық округтер әкімдері сөгіс алды;
-
Облыстық басқарма басшылары (туризм, экология, сәулет, сауда, кәсіпкерлік) жазаланды;
-
Сондай-ақ аумақтық министрлік бөлімшелерінің — экология, денсаулық сақтау, су ресурстары, көлік, қаржы, сауда және интеграция — жетекшілері де жауапқа тартылды.
Жол картасы жасақталады
Инспекция нәтижесінде өңірлерде орталық мемлекеттік органдардың қатысуымен көшпелі тексерулер жалғасып жатыр. Жақын арада туристік инфрақұрылымды дамытудың жол картасы әзірленіп, саладағы түйткілді мәселелерге нақты шешім ұсынылады.
Сонымен қатар, тұрақты бақылау жүргізу мақсатында жобалық кеңсе құрылды. Ол туристік қызметтердің сапасын арттыру, курорттық аймақтарды абаттандыру және қоғамдық қауіпсіздікті қамтамасыз ету бойынша үйлестіруші рөл атқарады.
фото: pixabay
