Алматы облыстық прокуратурасы Талғар аудандық полициясының қызметкерлеріне әрекетсіздік танытқаны үшін қылмыстық іс қозғады. Бұл туралы ведомствоның баспасөз қызметі хабарлады.
Адвокат Гаухар Сариеваның айтуынша, оқиғаға дейін күдікті әйел адамды зорлаған. Сариева күйеуімен бірге күдіктіні ұстап, полицияға тапсырғанымен, құқық қорғау органдары оны бір күннен кейін босатып жіберген.
Бостандыққа шыққан күдікті жәбірленушінің ағасының үйіне барып, оны атып өлтіріп, екі жасар қызын ұрлап кеткен. Қазір ол құзырлы органдардың қолына түсті, ал бүлдіршінге ота жасалды.
Прокуратураның мәліметінше, 6 қыркүйекте Талғар аудандық полициясының қызметкерлеріне қатысты ҚР ҚК 370-бабының 4-бөлігі («Билік немесе лауазымдық өкілеттіктерді орындамау») бойынша іс қозғалды. Тергеу облыстық прокуратураның ерекше бақылауына алынған.
фото: istockphoto.com
