2025 жылдың 13 наурызынан бастап Қазақстанда тұтынушылардың құқығын бұзған кәсіпкерлерге айыппұл салынады.
Бұл өзгерістер туралы Сауда және интеграция министрлігіне қарасты Тұтынушылардың құқықтарын қорғау комитеті төрағасының орынбасары Серік Құсайынов мәлімдеді.
Бұған дейін мұндай құқық бұзушылықтар үшін тек ескерту жасалатын. Енді айыппұл мөлшері бизнес субъектісінің көлеміне байланысты шағын бизнеске – 15 АЕК (58 980 теңге), орта бизнеске – 20 АЕК (78 640 теңге), ірі бизнеске – 25 АЕК (98 300 теңге) салынады.
Тұтынушылардың құқығын қорғау комитетінің мәліметінше, 2024 жылы Қазақстан азаматтарынан 62,5 мың шағым түскен. Өтініштердің 44,5%-ына жауап берілген, тұтынушыларға тауарлар мен қызметтер үшін 2 миллиард теңгеден астам қаражат қайтарылған
Қаңтар-ақпан айында 10 мыңнан астам шағым түскен. Көбіне азаматтар туризм, тұрғын үй-коммуналдық шаруашылығы (ТКШ), денсаулық сақтау және сауда салаларына шағымданады.
Осы уақытқа дейін Қазақстан азаматтарының өз құқықтарын қорғау деңгейі жыл сайын артып келетінін жазған болатынбыз.
Сурет: gov.kz
