23 шілде сағат 15:37-де Шығыс Қазақстан облысында жер сілкінісі тіркелді. Бұл туралы Төтенше жағдайлар министрлігі хабарлады.
Министрлік мәліметінше, жер сілкінісі Шығыс Қазақстан облысына қарасты 25 ауданда орын алған. “Ұлттық ғылыми-сейсмологиялық зерттеулер орталығының” сейсмикалық станциялар желісі апатты дер кезінде анықтады.
Көкпекті, Самар, Жарма, Ұлан аудандары мен Өскемен қаласында жер сілкінісі 4 балға бағаланған. Глубокое, Күршім, Алтай, Риддер, Катонқарағай және Ақсуат аудандарында магнитуда 3 балға жеткен.
Зардап шеккендер туралы ақпарат келіп түскен жоқ.
Ауруханалар мен өзге де нысандар жұмыс істеп тұр.
Естеріңізге сала кетейік, 2025 жылғы 10 сәуірде Атырау облысының Құлсары ауданында 4 балдық жер сілкінісі тіркеліп, артынша 11 мамыр Теңіз мұнай-газ кен орны аумағында 4,2 балдық дүмпулер сезілді.
