Сербияда шеруге шыққан он мыңдаған адам бірнеше айдан бері тарқамай тұр. Тұрғындар ел үкіметін жемқорлық қылмысы үшін айыптап отыр, деп жазды Euronews.
Белградта шеруге қатысқандар мерзімінен бұрын парламент сайлауын өткізуді талап етіп келеді. Көшеде наразылық білдірген жастар полициямен қақтығысты.
Бұқараның толқуына 2024 жылдың қараша айында Нови-Сад қаласындағы темір жол вокзалына кіреберістегі шатырдың қирауы себеп болған. Осы оқиға салдарынан 16 адам жазым болды. Прокуратура бірнеше жауапты шенеунікке іс қозғады. Бірақ бұрынғы құрылыс министрі Горан Весичтің тергеуден босатылуы көптің көкейіне күмән ұялатты.
Елдегі студенттер бірден шеруге шыққан. Олардың табанды қарсылығы нәтижесінде үкімет басшысы Милош Вучевич қызметінен кетуге мәжбүр болды. Наразылық акциясының белсенділері елдегі инфрақұрылым жобалары жемқорлық салдарынан ақсап отыр деп билікті сынаған.
Сербия президенті Александр Вучич жуырда парламент мүшелерін сайлау өткізілмейтінін мәлімдеді. Шеруге шыққандармен қақтығыста алты тәртіп сақшысы жараланған. Сенбідегі толқуға 36 мыңдай адам қатысты деп есептейді ІІМ. Полиция қызметкерлері он шақты адамды ұстады.
Сербияда парламент сайлауын 2027 жылы өткізу жоспарланған. Вучич ел ішіне іріткі салғысы келген күштер бүлікті ұйымдастырып отыр деп есептейді.
Фото: © AP Photo / Marko Drobnjakovic
