Семейде кәмелетке толмаған балалар арасындағы әлімжеттік оқиғасына қатысты сотқа дейінгі тергеу басталды. Бұл туралы Абай облысының полиция департаменті хабарлады.
25 ақпанда кәмелетке толмағандардың құқықтарын қорғау жөніндегі комиссия отырысы өтті. Комиссия оқиғаға қатысы бар жасөспірімдерді уақытша оқшаулап, девиантты мінез-құлықты балаларға арналған мамандандырылған мектепке жіберу ұсынған.
“Комиссия үш әке-шешені ата-ана құқықтарынан айыру және бір өкілге қатысты екі балаға қамқоршылықты тоқтату туралы ұсыныс жасады. Барлық материал сотқа берілді, онда соңғы шешім қабылданады. Кәмелетке толмағандар ісі жөніндегі сот жасөспірімдердің мамандандырылған мекемеде болу мерзімін анықтап, ата-ана құқықтарынан айыру туралы түпкілікті қаулы шығарады”, -делінген хабарламада.
Абай облысы департаментінің хабарлауынша, жәбірленуші балаға арнайы орталықта психологиялық көмек көрсетіліп жатыр.
Осыған дейін әлеуметтік желіде мектеп оқушысын жабылып ұрып, әлімжеттік көрсеткен бір топ баланың видеосы тарады. Қуаныш Рахметоллаұлы есімді желі қолданушысының жазуынша, оқиға 22 ақпанда Семей қаласындағы 343-квартал ауданында №9, №15 мектептердің 6-7 сынып оқушылары арасында болған. Соның ішінде жасөспірімдер 6-сынып оқушысына тіл тигізіп, темекті тартқызып, қорлап, ұрып-соққан делінген.
Алдын ала мәліметтер бойынша, жәбірленуші баланың анасы қайтыс болған. Оны әжесі мен әкесі тәрбиелеп отыр.
Сурет: Видеодан скрин
