Әр бесінші Қазақстан азаматы елден көшуді ойлайды. Бұл ақпаратты Demoscope қоғамдық пікірді зерттеу бюросы «Қазақстандықтардың шетелге кеткен білікті мамандар туралы ойы» деген тақырыпта жүргізген сауалнама нәтижесіне сүйеніп жариялады.
Сауалнама нәтижесінде респонденттердің 21%-ы елден көшу туралы ойланады. Олардың ішінде 6,9%-ы алдағы 2-3 жылда көшуге ниетті болса, 5,6%-ы көшуге мүмкіндік іздейді. Ал 8,4%-ы белгілі бір жағдай туындаса, шетелге көшу мүмкіндігін қарастырып отыр. Сонымен қатар, сауалнамаға қатысушылардың 78,5%-ы жақын арада елден кету жоспары жоқ екенін айтты.
Әр бесінші азаматтың шет елге көшуді ойлауына негізі себеп — төмен жалақы мен жарқын болашаққа сенімнің болмауы. Қызық жайт, сауалнамаға қатысқан жастардың көбі шет елге көшудің себебі – сапалы білім алуға және өзін-өзі дамытуға ұмтылыс деп көрсетсе, ал орта және үлкен жастағы топтар өздері мен балалары үшін елде мүмкіндік жоғын айтқан.
Дегенмен көшуге ниет білдірген респонденттер – жастар мен орта жастағы адамдар.
«18-29 жас аралығындағы жастардың шамамен 25%-ы көшу туралы ойланса, 30 жастағылар арасында бұл көрсеткіш 30%-ға жақын. Одан кейінгі жас санатындағы әр оныншы адам нақты көшуге ниетті (10,7% – «алдағы 2-3 жылда көшуді жоспарлап отыр») – делінген суалнамада.
Қосымша айтылған себептер: Сапалы медициналық қызмет (4,9%), Кәсіби өсу мүмкіндігі (4,4%), Қолайлы экология мен климат (3,8%), Саяхаттау (3,3%), Өмір сүруге қауіпсіз жер (3%), Туыстарға жақын жерге көшу (2,6%), Ортасын кеңейту (1,3%), Бизнес дамыту (0,7%), Тарихи отанына оралу (0,6%).
«Осы уақытқа дейін елден кеткен тұлғалардың арасында сұранысқа ие техникалық мамандық иелері (1,2 мың адам), экономистер (589 адам), педагогтар (385 адам), сәулетшілер мен құрылысшылар (261 адам), сондай-ақ заңгерлер (170 адам) үлесі көп» — екенін айтады.
Айта кетейік, сауалнама 2024 жылғы 13-24 қараша аралығында PaperLab зерттеу орталығымен бірлесе отырып жүргізілген. Оған Қазақстанның 17 облысынан, сондай-ақ Астана, Алматы және Шымкенттен 1100 адам қатысқан.
Сауалнама нәтижесіне сүйеніп, авторлар: «Мемлекеттік басқару сапасын арттырмай және кәсіби кадрларды қолдауға бағытталған шаралар қабылдамай, Қазақстаннан білікті мамандардың кету тенденциясын өзгерту өте қиын болады», — дейді.
Cурет: pexels.com
