Мамыр айында Ғ. Құрманғалиев атындағы облыстық филармонияға академиялық атақ берілетіні белгілі болған еді.
Филармония директоры Бауыржан Халиолла қазіргі уақытта Мәдениет министрлігі қабылдайтын құжаттарды дайындап жатқанын хабарлады.
«Шіркін-ай, саңлақ әншінің есімін иеленген қасиетті шаңыраққа келер жылы 60 жыл толады. Сол атаулы мерейтой қарсаңында филармонияға академиялық мәртебе берілсе ғой» деп ойлаушы ем», — дейді мекеме басшысы.
Мәдениет және өнер қызметкерлері күні қарсаңында осы ұсынысты президент Қасым-Жомарт Тоқаевтың өз аузынан естігенде, таң қалғанын есіне алады. Бауыржан Халиолла «Атамекен» өнер ордасы мен Ғ. Құрманғалиев атындағы филармонияны біріктіру оңайға түспегенін атап өтті.
«Мамандығым журналист бола тұра, мәдениет саласында аз-кем еңбек етіп келе жатырмын. Былтыр тамыз айында Батыс Қазақстан облысының мәдениет пен өнер саласында елеулі өзгеріс болды. Ол — «Атамекен» өнер ордасы мен Ғ. Құрманғалиев атындағы облыстық филармонияның оңтайландыру тәсілі бойынша бірігуі еді. Ел-жұрт екіұдай пікірде болғаны рас. Әсіресе ұжым мүшелерінде біраз түсініспеушілік орнады», — деді Б. Халиолла.
Филармония директоры қазіргі уақытта шаруа сәтімен болып жатқанын айтқан. Мекеменің академиялық мәртебе алуы үшін де дайындық қызу жүргізіліп жатқанын тілге тиек етті.
«Мәдениет министрлігінің табалдырығын тоздырып, керекті құжатты жинап, тапсыру үстіндеміз. Қазір де апта соңымен санаспай кабинетте қамалып, қағазға көміліп отырмын. Жыл соңында жақсы жаңалықты бірге бөлісуге жазсын, ағайын», — деп тәмамдады сөзін ақын.
фото: Архив
