Қазақстан мен Ресей арасындағы шекара бекетінде көлік қозғалысы уақытша шектеледі. 7 қазаннан бастап Ресейдің Саратов облысындағы «Озинки» автомобиль өткізу бекетінде – Тасқала өткізу пунктінде жүк көліктеріне арналған жолақта күрделі жөндеу жұмысы басталады. Бұл жөнінде Мемлекеттік кірістер комитеті хабарлады.
Жолдағы жөндеуге байланысты өткізу пунктінде шектеулер болуы мүмкін екендігі ескертілді. Аталған жолдағы жөндеу 31 қазанда аяқталады деп жоспарланған.
– «Тасқала» автомобиль өткізу пункті арқылы мемлекеттік шекараның Қазақстан-Ресей учаскесін кесіп өтуді жоспарлағандарға осы ақпаратты ескеруді сұраймыз. Қосымша жаңалықтар біздің ресми парақшаларда жарияланады, — деп хабарлады комитеттен.
Жалпы Батыс Қазақстанның ресейлік көршімен шекаралас аумағы 1,5 мың шақырымды құрайды.
Өңір федерацияның бес облысымен шектеседі. Сондай-ақ облыс аумағында алты бақылау-өткізу бекеті бар.
Сурет: freepik.com
