Ұлттық банк базалық мөлшерлемені 16,5% деңгейінде сақтап қалуды ұйғарды. Бұл жөнінде банк төрағасы Т. Сүлейменов мәлімдеді.
«Экономикадағы инфляциялық қысым, ең алдымен, қызметтер мен азық-түлік саласында күшейіп келеді. Инфляциялық күтулер де жоғарылады.
Сұраныс ұсыныстан артып отыр. Тұтынушылық несиелеудің әлі де жоғары болуы инфляцияны қосымша күшейтуде», — деп хабарлады банк төрағасы.
Ұлттық банк төрағасы Ресейдегі инфляция қарқынының күшеюі ел экономикасына кері әсер етіп отырғанын да жоққа шығармады.
Мамырдағы есеп бойынша Қазақстандағы жылдық инфляция 11,3%-ға жетті.
«Реттелетін тұрғын үй-коммуналдық қызмет тарифтерінің жылдық өсімі 25,8%-ті құрады. Реттелмейтін нарықтық қызметтер де 14,7%-ке қымбаттады», – деп жазылған ҰБ басшысы есебінде.
ТМД елдерінен импорталатын тауарлардың көтерме бағасы жоғарылады. Ауыл шаруашылығы өнімдері де қымбаттады. Осыған байланысты азық-түлік инфляциясы да күшейді.
Банк зерттеуінше шикізат өндірмейтін салаларда сәл де болсан қарқын артқан. Сөйте тұра өндіріс орындары ішкі сұранысты қамтамасыз ете алмай отыр. Тұтыну бағыты бойынша берілетін несие көлемі көбейді.
Мұнай өндірісінің қарқыны төмендеді. Қытай тарапынан қара алтынға сұраныс азайды. Оған қоса ОПЕК+ талабы бойынша Қазақстан өндіріс көлемін шектеуге міндетті.
Data Hub та банк дерегін талдады:
«Негізгі тәуекелдердің ішінде Ұлттық банк ішкі сұраныстың күшеюін, сыртқы қысымды және инфляциялық күтулердің тұрақсыздығын атап өтті. Сонымен қатар ЖЖМ бағасының өсу қарқыны мен ҚҚС-тың көтерілуінен туындайтын жанама әсерлердің қандай болары әзірге белгісіз.
Жалпы алғанда, Ұлттық банк тәуекелдер балансының инфляцияға қарай ығысқанын атап өтті. Сондықтан базалық мөлшерлеме жыл соңына дейін қазіргі деңгейінде сақталуы мүмкін, алайда оның жоғарылауы да жоққа шығарылмайды».
Айта кетейік, бұған дейін Sarapshy.info экономика деректерін талдаған еді. «DAMU Capital Management» компаниясының бас директоры, экономист Мұрат Қастаев Қазақстан экономикасының Ресейге тәуелді болуының салдары оңай болмайтынын айтқан еді.
фото: unsplash.com
