Орал қаласының Гагарин көшесі бойында «№2 мектеп» аялдамасының орны 2024 жылдан бері бос тұр. Бұған наразы болған тұрғын Нұрсұлтан Мұқанов Sarapshy.info редакциясына жүгінді.
Оның айтуынша, жаңбырлы күндері аялдама маңы балшыққа батады, ал автобустар бұл жерге тоқтамай өтіп кетеді.
«Аялдама орнатуды сұрап жүргеніме бір жылдан асты. Алғашында бұл жерге тіпті автобустар тоқтамай жүрді. Кейін өзім әкімдікке хабарласып, аялдама белгісін орнатуды өтіндім. Бірақ аялдама павильоны әлі жоқ. Бұл әсіресе мектеп оқушылары үшін ыңғайсыз, қазір балалар сабақтарына жеткенше лай кешіп өтеді.
Кейде жүргізушілер белгіні байқамай балаларды келесі аялдамадан түсіріп кетеді. Екі аялдаманың арасы 500 метр.
Бұл жерде жаяу жүргіншілер жолағы да болған жоқ. Әкімдікке өтініш тастап, бірнеше күннен кейін салынды», – деді ол.
Орал қаласының әкімдігі тұрғынға аялдамаға қажетті материалдар дайын екенін және мердігер компания іздестіріліп жатқанын хабарлаған.
«Қазіргі уақытта №2 мектеп аялдамасының павильоны жөнделуде. Жөндеу аяқталған соң орнатылады», — деп жауап берді қала әкімдігі.
Аялдама павильондарының бағасы неге құпия?
2025 жылдың сәуірінде қаланың тұрғын үй-коммуналдық шаруашылығы, жолаушы көлігі және автомобиль жолдары бөлімі (ТҮКШ ЖКжАЖ) қалада жаңа аялдамалар орнатуға кірісті. Жоспар бойынша Оралда 73 жаңа аялдама орнатылуға тиіс.
Мемлекеттік сатып алу порталында павильондардың бағасына қатысты нақты дерек жоқ. ТҮКШ ЖКжАЖ бөліміне аялдамалардың құнына қатысты сауал жолдаған umarovnews.kz ақпарат агенттігі де тиісті жауап ала алмады.
«Аялдама павильондарының бағасы жайлы ақпарат құпия түрде қалуға тиіс», — деп жауап берген Орал ТҮКШ бөлімі.
Облыс прокуроры: “Мектептердің айналасында жарық та, камера да жоқ”
Оралда қылмыстың алдын алу және қоғамдық қауіпсіздік шаралары талқыланған жиында облыс прокурорының орынбасары Азамат Құстанов қаладағы мектептер төңірегін жабдықтау керек екенін айтқан.
Жиында облыс прокуроры Азамат Құстанов мектеп маңындағы қауіпсіздік ахуалына ерекше тоқталды.
«Қала орталығында орналасқан кей мектептердің жағдайы көңіл көншіте бермейді. Мәселен, N35 мектеп-лицей, N15, N24 мектептерге баратын жолдарда электр жарығы жоқ. Қаланың басқа аудандарында қауіпсіздік мәселесі де алаңдатады. Мәселен, N5 орта мектеп оқушылары гараж кооперативтері аумағы арқылы өтеді. Ал қалада 60 бейнебақылау камерасы мүлдем жұмыс істемейді. Бұның бәрі қылмыс жасауға қолайлы жағдай туғызып отыр», – деді ол.
