Бүгін, 8 қаңтар күні, таңертең «Алый парус» ЖШС-на тиесілі №3, №3к, №14, №35, №51 қалалық автобус жүргізушілері жұмысқа шықпады. Бұл туралы Орал қаласы әкімдігінің баспасөз қызметі хабарлады.
Автобус жүргізушілері кәсіпорын жалақы, зейнетақы, медициналық сақтандыру жарнасын дұрыс төлемейтініне наразы.
Жұмысшылардың сөзінше, олар маусым айынан бері, яғни 7 ай бойы зейнетақы қоры мен медициналық сақтандыруға түсетін қаржыны алмаған. Оған қоса, 2024 жылдағы еңбек демалысының тиісті қаражатын да ала алмай жүр. Сондай-ақ ай сайын кешігетін жалақы олардың күнделікті тұрмыс-тіршілігіне зиянын тигізіп отыр.
Тиісті төлемдер жасалмағанның салдарынан жұмысшылар ауруханаларға қарала алмай жүргендерін айтады.
«Наразылық білдіруіміздің негізгі себебі – зейнетақы мен медициналық сақтандыруымыздың төлемдері түспеді. Сол себепті дәрігерге қарала алмаймыз, еңбекке жарамсыздық парағын аша алмаймыз. Зейнетақы түспеген соң кезегі жетіп тұрған үйімізді ала алмадық, бірімізге банктен несие рәсімдеу, екінші әріптеске несиені жабу қиындады. Шыдамымыз бітті. Жеті ай күттік. Жұмыс орнында жиналыс та өткіздік. Мәселе шешілмеген соң осылай наразылық білдіруге мәжбүр болдық», — деді өзінің атын айтпауды өтінген автобус жүргізушісі.
Жүргізушінің айтуынша, таңертең наразылық алаңына қалалық тұрғын үй-коммуналдық шаруашылығы бөлімінің өкілдері де келіп, жұмысқа шықпаса, айыппұл салатынын, жұмыстан шығаратынын ескерткен.
Наразы жұмысшылармен кездескен Орал қаласының әкімі Мұрат Байменов пен әкімнің орынбасары Азамат Халелов барлық төлем ақпан айының басында толық төленеді деген. Бұл туралы автобус жүргізушісі де мәлімдеді:
«Қала әкімі де, әкімнің бірінші орынбасары да келді. Бірінші ақпанда зейнетақыны, еңбек демалысының ақшасын, 20 шақты адам бар еңбек демалысының ақшасын алмаған, соны да аударамыз деді».
Жұмысшылармен сөйлесіп, олардың толық режимде жұмысқа шығатынын хабарлаған әкім орынбасары субсидия толық түспеуіне байланысты, төлемдер кешігіп жатыр дейді.
«2024 жылдың 11 айы ішінде «Алый Парус» ЖШС жалпы сомасы 898 млн теңге субсидия алу үшін өтінімдер берді. Оның ішінде 545 млн теңге немесе сұралған соманың 60%-ы ғана төленді. Жүргізушілердің орташа жалақысы – 390 мың теңге. Кәсіпорында 85 адам жұмыс істейді», — деп көрсеткен қала әкімінің баспасөз қызметі хабарламасында.
Таңертеңгі сағат 8:00-де наразылық білдірген жұмысшылар 11:00-де жұмысқа оралған. Жолаушылар тасымалы толық көлемде қалпына келтірілді деді әкімдік.
Сурет: Автобус жүргізушісінен
