Оңтүстік Кореяның батыс және оңтүстік аймақтарында үш күннен бері толассыз нөсер жаңбыр жауып жатыр. Апат салдарынан кемінде төрт адам қаза тапты, тағы екеуі із-түзсіз жоғалғандар қатарында. Қауіпсіздік мақсатында 5 мыңнан астам тұрғын эвакуацияланды.
Ең көп жауын-шашын Кванджу қаласында тіркелген – тәулігіне 400 миллиметрден астам. Бұл – соңғы 86 жылдағы рекордтық көрсеткіш.
Жергілікті биліктің хабарлауынша, нөсер жаңбырдың кесірінен көлік жолдары мен теміржолдарды су басып, қоғамдық транспорт қозғалысын ішінара тоқтатуға тура келді.
Сеулден оңтүстікке қарай 44 км жерде орналасқан Осан қаласында жол бойындағы 10 метрлік бағана көлікке құлап, жүргізуші қаза тапты. Оңтүстік Чхунчхон провинциясында бір адам жертөледе суға тұншығып көз жұмды.
Екі адам су басқан көлікте қалып қойған. Құтқарушылар оларды әлі іздестіріп жатыр.
Метеорологиялық қызмет алдағы күндері жаңбыр мен лай көшкіні қаупі сақталатынын ескертіп, тұрғындарды барынша сақ болуға шақырды.
Оңтүстік Корея президенті Ли Джэ Мён табиғи апаттардың алдын алу және зардаптарын жою жұмыстарын күшейтуді тапсырды.
Еске салсақ, өткен жылы да елде осындай нөсер жауын болып, адам шығыны мен инфрақұрылымға үлкен залал келген болатын.
