28 наурыз Мьянмада болған жер сілкінісінен қаза тапқандар саны 1700-ден асқан.
The Associted Press редакциясының соңғы мәліметінше, 3 400-ден астам адам жарақат алған, 300-ден аса адам хабар-ошарсыз кеткен. Бұл сандар үнемі жаңартылып отыруы мүмкін, себебі құтқару жұмыстары әлі жалғасып жатыр.
Естеріңізге сала кетейік, осыдан 3 күн бұрын Мьянмада жер сілкінісі болды. Магнитудасы 7,7 (кей деректерде 6,4 балл) болған зілзала ошағы Мандалай қаласына жақын орналасқан. Жер сілкінісі бүкіл ел аумағында сезіліп, көрші мемлекеттерге де әсер етті.
Қызыл Крест (IFRC) ұйымының мәлімдеуінше, Азияда соңғы жүз жылда мұндай жойқын жер сілкінісі болмаған. Бұл туралы The Guardian басылымы жазды.
Осы уақытқа дейін Мьянмаға Қытай, Үндістан, Малайзия, Таиланд, Гонгконг елдері мен халықаралық ұйымдар гуманитарлық көмек көрсеткен. Біріккен Ұлттар Ұйымы Мьянмаға көмек ретінде 5 миллион доллар бөлді. БҰҰ деректері бойынша, инфрақұрылымның бұзылуынан гуманитарлық көмек жеткізу қиынға соғуда — кейбір жолдар мен көпірлер істен шыққан.
Қазақстан Президенті Қасым-Жомарт Тоқаев Мьянма премьер-министріне көңіл айту жеделхатын жолдап, қаза тапқандардың отбасыларына көңіл айтты.
Сурет: Ашық дереккөздерден
